- ११ कार्तिक २०८३, बुधबार / Oct 28, 2026
काठमाडौँ, २९ कार्तिक । सोह्रखुट्टेमा अवैध रूपमा ‘म्यारिज ब्यूरो’ सञ्चालन गरेको आरोपमा चार जना चिनिया नागरिकलाई अध्यागमन विभागले पक्राउ गरेको छ।
व्यवसायसम्बन्धी भिसामा नेपाल आएका उनीहरूले गरिब तथा विपन्न परिवारका युवतीलाई चिनिया नागरिकसँग विवाह गराउने धन्दा चलाएको भन्ने विशेष सूचनाको आधारमा खटिएको टोलीले शुक्रबार साँझ उनीहरूलाई नियन्त्रणमा लिएको विभागका महानिर्देशक रामचन्द्र तिवारीले जानकारी दिए।
पक्राउ परेकामध्ये एक महिला र तीन पुरुष रहेका छन्। अनुसन्धानका क्रममा उनीहरूमध्ये केहीले लामो समयदेखि फरक–फरक भिसामा नेपाल–चीन आवतजावत गर्दै आएको तथ्य खुलेको विभागले जनाएको छ।
विभागका अनुसार उनीहरूले केही नेपाली महिलालाई विवाहका नाममा चीनसम्म पठाइसकेको प्रारम्भिक अनुसन्धानबाट खुलेको छ। घटनाको विस्तृत छानबिन जारी रहेको बताइएको छ।
