तीन करोडमुनिका आयोजना बजेटमा नआउने, सामाजिक सुरक्षा र तलबमा समायोजनको तयारी

काठमाडाैं १५ जेठ । सरकारले विहीबार दिउँसो ३ बजे आगामी आर्थिक वर्ष २०८२/८३ को संघीय बजेट सार्वजनिक गर्दैछ। अर्थमन्त्री विष्णु पौडेलले प्रतिनिधिसभा र राष्ट्रिय सभाको संयुक्त बैठकमा बजेट प्रस्तुत गर्ने कार्यक्रम तय भएको छ।

राष्ट्रिय स्रोत अनुमान समितिको सिफारिसअनुसार करिब १९ खर्ब ६५ अर्ब रुपैयाँको बजेट ल्याइने तयारी छ। यसपटक बजेटमा नयाँभन्दा पनि अधुरा रहेका पूर्वाधार परियोजना सम्पन्न गर्ने प्राथमिकता दिइएको छ।

अर्थ मन्त्रालयले तीन करोड रुपैयाँभन्दा कम लागतका आयोजना बजेटमा नराख्ने निर्णय गरेको छ। वृद्धभत्ता पाउने उमेर हेरफेर गरिने, निजामती कर्मचारीको तलब वृद्धिको सम्भावना, र कर प्रणालीमा समायोजन गरिनेबारे पनि बजेटमा चर्चा हुने अनुमान छ।

बजेटसँगै आर्थिक सर्वेक्षण तथा अर्थसम्बन्धी विधेयकहरू पनि संसदमा प्रस्तुत गरिनेछ। यद्यपि, गृहमन्त्रीको राजीनामा माग्दै संसद अवरुद्ध गरिरहेका विपक्षी दलहरूले बजेट प्रस्तुतिमा भने अवरोध नगर्ने बताएका छन्।