मूल्य बढेसँगै भोजपुरमा अलैँची खेती विस्तार

मुख्य बुद्धा

मूल्य वृद्धि र खेती विस्तार: अलैँचीको मूल्य प्रतिमन १ लाखदेखि १ लाख २ हजार रुपैयाँसम्म

किसानको उत्साह: टेम्केमैयुङ–५ मा करिब १५० किसान व्यावसायिक अलैँची खेतीमा संलग्न

उत्पादन क्षेत्र र जात: जिल्लामा ५९७ हेक्टरमा रामशाही, गोलशाही, डम्बरशाही र जिर्मले जातका अलैँची उत्पादन

महासङ्घको माग: अलैँची व्यवसायी महासङ्घले रोग र कीरा नियन्त्रणका लागि प्रत्येक अलैँची जोनमा कृषि प्राविधिकको व्यवस्था गर्न माग

भोजपुर, २५ साउन । अलैँचीको मूल्य बढेपछि भोजपुरका किसान खेती विस्तारमा लागेका छन् । गएको वर्ष उत्पादन भएको अलैँची प्रतिमन एक लाखदेखि एक लाख दुई हजार रुपैयाँसम्म बिक्री भएपछि किसान नयाँ बगैँचा विस्तारसँगै पुराना बगैँचाको संरक्षणमा जुटेका हुन् ।

टेम्केमैयुङ–५ का किसान शिवकुमार विष्टका अनुसार मूल्य बढेसँगै परम्परागत बाली हटाएर फेरी अलैँची खेतीमा फर्किने किसानको सङ्ख्या बढेको छ । केही वर्षअघि मूल्य घटेपछि विस्तारमा कमी आएको भए पनि अहिले बजारमा राम्रो मूल्य पाउन थालेपछि उत्साह बढेको उहाँको भनाइ छ । टेम्केमैयुङ–५ मा झन्डै डेढ सय किसानले व्यावसायिक रूपमा अलैँची खेती गरिरहेका छन् ।

कृषि ज्ञान केन्द्रका अनुसार जिल्लामा अहिले झन्डै पाँच सय ९७ हेक्टरमा रामशाही, गोलशाही, डम्बरशाही र जिर्मले जातका अलैँची उत्पादन भइरहेका छन् । चोलन्ती, दोभाने, कुदाकाउले, साम्पाङ, अन्नपूर्ण, चम्पे, खावा, छिनामखु, किमालुङ, वासिङ्थर्पु, तिम्मा, हेलौछा र गुप्तेश्वरलगायतमा अलैँची खेती बढी हुने गरेको छ ।

अलैँची व्यवसायी महासङ्घले रोग र कीरा नियन्त्रणका लागि हरेक अलैँची जोनमा एक कृषि प्राविधिकको व्यवस्था गर्नुपर्ने माग गर्दै आएको छ । राज्यले प्राविधिक सहयोग गरे किसानले अझ बढी आम्दानी लिन सक्ने महासङ्घले जनाएको छ । माटो परीक्षण र नयाँ नर्सरी स्थापना गर्न सके अलैँची भरपर्दो आयस्रोत बन्न सक्छ । रासस