- १ भाद्र २०८३, सोमबार / Aug 17, 2026
काठमाडौं, २ भदौ । नेपाल राष्ट्र बैंकले चाँदी आयातमा सटही सुविधा विस्तार गर्दै प्रतिपटकको भुक्तानी सीमा पाँच लाख अमेरिकी डलरसम्म पुर्याएको छ ।
यसअघि, औद्योगिक प्रयोजनका लागि चाँदी आयात गर्ने सुनचाँदी व्यवसायीले प्रतिपटक तीन लाख डलरसम्मको सटही सुविधा प्राप्त गर्दै आएका थिए । अब भने राष्ट्र बैंकले उक्त सीमा बढाएर पाँच लाख अमेरिकी डलर वा सो बराबरको अन्य परिवत्र्य विदेशी मुद्रासम्मको सुविधा उपलब्ध गराउने भएको छ ।
त्यस्तै, अन्य सुनचाँदी व्यवसायीले चाँदी आयात गर्दा अमेरिकी डलर एक लाख वा सो बराबरको सटही सुविधा लिन सक्नेछन् । राष्ट्र बैंकको विदेशी विनिमय व्यवस्थापन विभागका कार्यकारी निर्देशक रेवतीप्रसाद नेपालका अनुसार, सटही सुविधा प्राप्त गर्न निकासी आदेशको पुष्टि हुने अग्रिम भुक्तानी, प्रतितपत्र (LC), वा विदेशबाट प्राप्त खरिद आदेशसँग सम्बन्धित कागजात पेश गर्नुपर्नेछ ।
साथै, सटही सुविधा प्रदान गर्ने वाणिज्य बैंकले पहिल्यै दिइएको सटही सुविधाअन्तर्गत आयात भएको चाँदी तोकिएको म्यादभित्र निर्यात भएको छ वा छैन भन्ने पुष्टि गर्नुपर्नेछ।
वाणिज्य बैंक बाहेक अन्य बैंकमार्फत सटही सुविधा लिइएको खण्डमा व्यवसायीबाट निर्यात भुक्तानीमा कुनै बक्यौता नरहेको स्वःघोषणा लिनुपर्ने व्यवस्था पनि लागू गरिएको छ।
