- ५ असार २०८३, शुक्रबार / Jun 19, 2026
काठमाडौँ, २२ भाद्र । चेपाङ समुदायले आज आफ्नो राष्ट्रिय धार्मिक पर्व छोनाम अर्थात् न्वागी पर्व मनाउँदैछन्। हरेक वर्ष भदौ २२ गते मनाइने यो पर्वलाई २०६३ सालदेखि चेपाङ सङ्घको पहलमा सामूहिक उत्सवका रूपमा मनाउन थालिएको हो।
यस अवसरमा समुदायका सदस्यहरू भेला भई सांस्कृतिक कार्यक्रम गर्ने र नयाँ अन्नको पूजा गर्ने परम्परा रहँदै आएको छ। यस वर्ष न्वागी पर्वको केन्द्रीय कार्यक्रम चितवनको इच्छाकामना गाउँपालिका–६ कालिखोलामा आयोजना गरिएको छ।
नेपाल चेपाङ सङ्घका अध्यक्ष गोविन्दराम चेपाङका अनुसार चितवन, मकवानपुर, धादिङ र गोरखामा पालैपालो गरी न्वागीलाई राष्ट्रिय पर्वका रूपमा मनाउने गरिन्छ। चेपाङ समुदायमा भदौको पूर्णिमादेखि महिनाभर आफ्नो कुलअनुसार न्वागी मनाउने परम्परा छ।
पितृलाई अर्पण नगरी र पूजा नगरी नयाँ फलफूल तथा अन्न खान नहुने मान्यता रहिआएको छ। पर्वका दिन घैया धान, कागुनो, पिँडालु लगायतका अन्नपात र फलफूल पितृलाई चढाइन्छ। यसलाई नयाँ अन्न खाने दिनको रूपमा समेत लिइन्छ। राष्ट्रिय जनगणना २०७८ अनुसार नेपालमा ८४ हजार ३६४ जना चेपाङ बसोबास गर्छन्।
यसैबीच, बागमती प्रदेश सरकारले न्वागी पर्वको अवसरमा चितवन, मकवानपुर र धादिङ जिल्लामा आज सार्वजनिक बिदा दिएको छ। मकवानपुरको राक्सिराङ गाउँपालिकाले आज र भोलि गरी दुई दिनको बिदा दिएको छ भने गोरखाको गण्डकी गाउँपालिकाले पनि सार्वजनिक बिदा दिने चलन कायम राखेको छ।
