- २२ भाद्र २०८३, सोमबार / Sep 7, 2026
काठमाडौँ, २२ भाद्र । आज कोशी र कर्णाली प्रदेशका पहाडी एक–दुई स्थानमा ठूलो वर्षा पर्न सक्ने सम्भावना रहेको जल तथा मौसम पूर्वानुमान महाशाखाले जनाएको छ। मौसमविद्हरूका अनुसार सिक्किम आसपासको निम्नचापीय क्षेत्रको प्रभाव नेपालका पूर्वी भागमा परेको छ।
पछिल्लो तीन घण्टामा पाल्पाको कुमालगाउँ वर्षामापन केन्द्रमा ३७.८ मिलिमिटर वर्षा मापन गरिएको छ, जसलाई मध्यम वर्षा मानिन्छ। अन्य थोरै स्थानमा पनि गएराति हल्कादेखि मध्यम वर्षा भएको महाशाखाले जनाएको छ।
महाशाखाका अनुसार आज दिउँसो देशका पहाडी भागमा मौसम सामान्यतया बदली रहनेछ भने बाँकी क्षेत्रमा आंशिक बदली हुने अनुमान गरिएको छ।
पहाडी भागका केही ठाउँ र अन्य थोरै क्षेत्रमा मध्यम वर्षाको सम्भावना पनि रहेको छ। आज राति कोशी र मधेश प्रदेशसहित देशका पहाडी भागमा सामान्य बदली रहने र अन्यत्र आंशिक बदली रहने जनाइएको छ।
