- २२ भाद्र २०८३, सोमबार / Sep 7, 2026
काठमाडौं। बारा र पर्सामा हैजाविरुद्धको खोप अभियानमा लक्षित जनसंख्याको ७१ प्रतिशत ले खोप लिएको स्वास्थ्य सेवा विभागले जनाएको छ।
बाल स्वास्थ्य तथा खोप शाखा प्रमुख डा अभियान गौतम का अनुसार, बारा र पर्सा दुवै जिल्लामा कुल १० लाख १८ हजार ६० जनालाई लक्षित गरिएकोमा सात लाख २३ हजार ८३६ जनाले खोप लिएका छन्। खोप अभियानको प्रारम्भिक तथ्याङ्क अनुसार, पर्सा: अभियान सुरु भएको छैठौँ दिनमा ६ लाख ५२ हजार १२९ जनामा ४ लाख ५६ हजार ७७८ ले खोप।
बारा: ३ लाख ६५ हजार ९३१ जनामा २ लाख ६७ हजार ५८ ले खोप। पर्सामा फैलिएको हैजा महामारीको जोखिमका कारण, जिल्लाका सबै स्थानीय तह र पर्सासँग सिमाना जोडिएका बाराका छ वटा स्थानीय तह, कलैया उप–महानगरपालिका, जितपुर–सिमरा उप–महानगरपालिका, परवानीपुर गाउँपालिका, प्रसौनी गाउँपालिका, फेटा गाउँपालिका, विश्रामपुर गाउँपालिका मा एक वर्षमाथिका सबैलाई खोप दिइँदैछ।
असोज २६ देखि पर्सा र २७ देखि बारामा सुरु भएको अभियान सबै स्थानीय तहमा उत्साहका साथ जारी रहेको खोप शाखा प्रमुख डा गौतमले जानकारी दिए। “हाललाई भोलिसम्म अभियानलाई निरन्तरता दिन्छौं। तिहारपछि आवश्यकता अनुसार अभियान फेरि सञ्चालन गर्ने योजना छ,” उनले भने।
नेपाल सरकारले पर्सा र बारामा देखिएको हैजा महामारीको उच्च जोखिमलाई ध्यानमा राखी यो अभियान सञ्चालन गरेको हो। सरकारी तथा गैरसरकारी कार्यालय, नियमित खोप सेवा केन्द्र, मन्दिर–मस्जिद, बसपार्क, नेपाल–भारत सिमानाका मुख्य नाका, उद्योग–कारखाना, इँट्टाभठ्ठा जस्ता स्थानबाट खोप खुवाइँदै छ।
