काठमाडौं, २० असार । स्वतन्त्र नागरिक समाजले वर्तमान सरकारको १०० दिनको कार्यकालले नागरिकमा अपेक्षित आशा जगाउन नसकेको निष्कर्ष सार्वजनिक गरेको छ।
सरकारको कार्यसम्पादनको समीक्षा गर्न शनिबार काठमाडौंको माइतीघरमा आयोजित कार्यक्रममा वक्ताहरूले सरकारका उपलब्धि र कमजोरी दुवै पक्षमाथि टिप्पणी गरेका हुन्।
कार्यक्रममा वरिष्ठ अधिवक्ता दिनेश त्रिपाठीले सरकार बनेयता महँगी, बेरोजगारी र लोकतान्त्रिक संस्थामाथिको हस्तक्षेप बढेको आरोप लगाए। उनले संसदलाई प्रभावहीन बनाइएको, अध्यादेशमार्फत कानुन संशोधन गरिएको तथा भ्रष्टाचार नियन्त्रणमा सरकारले पक्षपातपूर्ण व्यवहार देखाएको दाबी गरे।
यद्यपि, सरकारका केही कामलाई भने सकारात्मक रूपमा मूल्याङ्कन गरिएको छ। शिक्षाविद् प्राध्यापक डा. नारायण कोइरालाले कक्षा १० र १२ को नतिजा समयमै सार्वजनिक गर्ने प्रयास, पाठ्यक्रम सुधार तथा विद्यालय म्यापिङका कार्यलाई उत्साहजनक कदमको रूपमा उल्लेख गरे।
राजनीतिक विश्लेषक देवेश झाले भ्रष्टाचारविरुद्धको अभियान, सरकारी जग्गा अतिक्रमण हटाउने कार्य र ड्राइभिङ लाइसेन्स वितरण प्रणालीमा भएको सुधारलाई सरकारका सकारात्मक उपलब्धिका रूपमा व्याख्या गरे।
वक्ताहरूले समग्रमा सरकारका केही सुधारात्मक प्रयासको प्रशंसा गरे पनि महँगी नियन्त्रण, रोजगारी सिर्जना, जनजीविका सुधार तथा सुकुम्बासी व्यवस्थापनजस्ता विषयमा सरकारले अझ प्रभावकारी र परिणाममुखी काम गर्नुपर्ने सुझाव दिएका छन्।
