शुक्रवारसम्म देशभर मौसम बदली, हावाहुरी र पानीको सम्भावना

काठमाडौं । देशका धेरैजसो स्थानमा पर्सि शुक्रवारसम्म मौसम बदली रहने जल तथा मौसम पूर्वानुमान महाशाखाले जनाएको छ। महाशाखाका मौसमविद् हरिप्रसाद दाहालका अनुसार अहिले पश्चिमी वायु, स्थानीय वायु र बङ्गालको खाडीबाट आएको जलवाष्पयुक्त हावाका कारण मौसम अस्थिर बनेको हो।

तराई क्षेत्रमा हावाहुरी चल्ने सम्भावना छ भने पहाडी र हिमाली क्षेत्रमा मेघगर्जन, चट्याङ र पानी पर्ने पूर्वानुमान गरिएको छ। कोशी, बागमती, गण्डकी र कर्णाली प्रदेशका हिमाली भूभागमा हिमपात हुन सक्ने सम्भावना पनि रहेको छ।

महाशाखाले हावाहुरीले दैनिक जनजीवन, कृषि, स्वास्थ्य, सडक र हवाई यातायातमा असर पार्न सक्ने भएकाले सतर्कता अपनाउन आग्रह गरेको छ। काठमाडौं उपत्यकामा अहिले आकाश बदली भएको छ र दिउँसोपछि छिटपुट पानी पर्न सक्ने अनुमान गरिएको छ।