- ११ बैशाख २०८३, शुक्रबार / Apr 24, 2026
दसैँ नजिकिँदै उपत्यका छाड्नेहरूको संख्या बढ्दै
घटस्थापनादेखि हालसम्म १ लाख ३८ हजार बढी बाहिरिएका
अग्रिम टिकट प्रणाली खुला नभए पनि एक दिन अगाडिको टिकट उपलब्ध
गोङ्गबु, माछापोखरी, कोटेश्वर, कलङ्कीमा यात्रुहरूको भीड
काठमाडौँ, ९ असाेज । दसैँ नजिकिएसँगै काठमाडौँ उपत्यका छोड्नेहरूको सङ्ख्या दिनप्रतिदिन बढ्दै गएको छ । स्कुल, कलेजहरूमा बिदा सुरु भएपछि राजधानीका विभिन्न बसपार्कहरूमा बिहानैदेखि भीड देखिन थालेको छ ।
काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक दीपक गिरीका अनुसार घटस्थापनादेखि हालसम्म करिब १ लाख ३८ हजार २९६ जनाले उपत्यका छाडिसकेका छन् ।
यस वर्ष विभिन्न कारणले अग्रिम टिकट बुकिङ खुला नगरिए पनि एक दिन अगाडिको टिकट लिने व्यवस्था गरिएको नेपाल यातायात व्यवसायी राष्ट्रिय महासङ्घले जनाएको छ । सो कारण टिकट लिनेहरू समेत गोङ्गबु बसपार्कमा लाम लाग्ने गरेका छन् ।
हाल गोङ्गबु नयाँ बसपार्क, माछापोखरीस्थित धादिङ बसपार्क, कोटेश्वर, कलङ्की लगायतका स्थानमा उपत्यका छोड्ने यात्रुहरूको बाक्लो भीड देखिएको छ ।
