- १५ जेष्ठ २०८३, शुक्रबार / May 29, 2026
काठमाडौं, २५ जेठ। अमेरिकाबाट डिपोर्ट गरिएका थप नेपाली नागरिक आज काठमाडौं आइपुग्ने भएका छन्। अमेरिकी चार्टर्ड विमानमार्फत उनीहरू त्रिभुवन अन्तर्राष्ट्रिय विमानस्थलमा आज अपराह्न सवा ४ बजे अवतरण गर्ने कार्यक्रम छ।
विमानस्थल अध्यागमन कार्यालयका प्रवक्ता तथा वरिष्ठ अध्यागमन अधिकृत अञ्जन न्यौपानेले ठूलो संख्यामा नेपाली फर्किन लागेको पुष्टि गरे पनि यकिन संख्या भने आउन बाँकी रहेको जानकारी दिए।
यसअघि अमेरिकी सरकारले जनवरी २० मा राष्ट्रपति डोनाल्ड ट्रम्पले सत्ता सम्हालेयता हालसम्म १४० भन्दा बढी नेपाली नागरिकलाई डिपोर्ट गरिसकेको छ। डिपोर्ट गरिएका नेपालीहरूलाई विमानस्थलमै प्रारम्भिक सोधपुछपछि घर पठाउने गरिएको छ। दलालको संलग्नता देखिए उजुरीको आधारमा अनुसन्धान सुरु गरिने मानव बेचबिखन नियन्त्रण ब्युरोले जनाएको छ।
डिपोर्ट गरिनुको पछाडि धेरै कारण छन्। मुख्यतः: गैरकानुनी प्रवेश: अमेरिका पुग्न ब्राजिल, इक्वेडर, मेक्सिको जस्ता मुलुक हुँदै अवैध रूपमा अमेरिकी सीमा पार गर्ने नेपालीहरूलाई सीमामा पक्राउ गरेर डिपोर्ट गरिन्छ। आश्रय माग अस्वीकृत: केही नेपालीले अमेरिका पुगेर राजनीतिक शरण माग गर्ने गर्छन्। तर प्रमाण नपुगेपछि शरण निवेदन अस्वीकार हुन्छ र डिपोर्ट गरिन्छ।
आप्रवासन कानुन उल्लङ्घन: भिसा अवधि सकिएपछि बसिरहनु, गैरकानुनी रूपमा काम गर्नु, झूठो विवरण पेस गर्नु जस्ता क्रियाकलाप डिपोर्टको कारण बन्न सक्छन्। अपराधमा संलग्नता: चोरी, घरेलु हिंसा, लागूपदार्थ कारोबारजस्ता मामिलामा संलग्न पाइएका विदेशी नागरिकहरूलाई अमेरिकाले तुरुन्त डिपोर्ट गर्न सक्छ। अमेरिकी नीति कडा हुनु: विशेषगरी ट्रम्प प्रशासनले आप्रवासनबारे कडा नीति लिएको थियो। कागजात नभएका आप्रवासीलाई प्राथमिकतामा राखेर डिपोर्ट गरिन थालेको हो।
डिपोर्ट भएका नेपालीलाई पुनःस्थापनाका लागि हाल त्रिभुवन विमानस्थलको अध्यागमन शाखा, मानव बेचबिखन नियन्त्रण ब्युरो, र सामाजिक विकास मन्त्रालयकाे संयोजनमा प्रक्रिया अघि बढाइन्छ। अध्यागमन प्रक्रियापछि उनीहरूलाई अस्थायी रूपमा घर पठाइन्छ। सरकारले गैरकानुनी आप्रवासनमा दलालहरूको संलग्नता रोक्न कडा निगरानी गर्ने र आवश्यक कारबाही गर्ने बताउँदै आएको छ।
