चिकित्सकको सेवा सुविधामा सरकार गम्भीर नभएको कांग्रेस उपसभापति धनराज गुरुङको आरोप

काठमाडौं, १४ भदौ । नेपाली कांग्रेसका उपसभापति धनराज गुरुङले अर्थतन्त्र बलियो बनाएर चिकित्सकका माग पुरा गर्नुपर्ने बताएका छन् ।

प्रजातन्त्रवादी चिकित्सक सङ्घको वार्षिक भेलाको अवसरमा शुक्रबार काठमाडौंमा आयोजित ‘स्वास्थ्य सेवा, पार्टी नेतृत्व र राष्ट्रिय प्रगतिका लागि एकीकृत कदम’ विचार गोष्ठीलाई सम्बोधन गर्दै उनले चिकित्सकको सेवा सुविधाका लागि सरकार गम्भीर हुनुपर्ने धारणा राखे ।

गुरुङले भने, “सेवा सुविधा थप गर्ने भन्ने वित्तिकै अर्थतन्त्रसँग जोडिन्छ । देशको अर्थतन्त्र वृद्धि गर्ने थुप्रै क्षेत्र रहेका छन् । त्यतातिर लागौँ । उहाँहरुको सेवा सुविधा बढाउन तिर लागौँ ।”

उनले घरेलु मदिरालगायतलाई कर दायरामा ल्याउन सके अहिले बजेटमा ६ खर्ब रुपैयाँ थप गर्न सकिने बताए । आफू कानूनमन्त्री हुँदा पटक–पटक कानून बनाउन प्रयास गरे पनि सफल हुन नसकेको उनले स्मरण गरे ।