- २३ बैशाख २०८३, बुधबार / May 6, 2026
दोधाराचाँदनी–८ जर्गाटोलका २५ घर डुबानमा, ७० जना सुरक्षित विद्यालयमा राखिएका
वडा ११ मा पनि पाँच घरमा पानी पसेको
शारदा ब्यारेजमा चारपांग्रे सवारी रोक, दुईपांग्रे मात्र सञ्चालन
सुदूरपश्चिम, गण्डकी, कोशी प्रदेशमा भारी वर्षा
कञ्चनपुर दोधारामा २४ घण्टामा १९९.२ मि.मि. वर्षा रेकर्ड
कञ्चनपुर, १६ भदौ । लगातारको वर्षाका कारण दोधाराचाँदनी नगरपालिका–८ रामपुरे टापुस्थित जर्गाटोलका २५ घर जोगबुढा नदीको पानीले डुबानमा परेका छन्। डुबानमा परेका ७० जनालाई जनज्योति माध्यमिक विद्यालयमा लगेर राखिएको छ भने प्रहरी टोली उद्धार कार्यमा सक्रिय छन्।
यसैगरी, वडा नम्बर ११ मा पनि पाँच वटा घरमा पानी पसेको छ। प्रहरी चौकी बाबाथान र इलाका प्रहरी कार्यालय दोधाराचाँदनीका टोलीहरूले उद्धारको काम गरिरहेका छन्।
महाकाली नदीमा पानीको बहाव उच्च भएपछि नेपाल–भारत सीमा क्षेत्रको शारदा ब्यारेज (बनबासा पुल) मा चारपांग्रे सवारीसाधनको आवागमन रोक लगाइएको छ। सोमबार बिहान पानीको बहाव एक लाख ५१ हजार क्युसेक नाघेपछि हाल चारपांग्रे गाडीलाई रोक लगाइएको छ भने दुईपांग्रे सवारीसाधन मात्र सञ्चालनमा छन्।
बरिष्ठ मौसमविद प्रतिभा मानन्धरका अनुसार, मनसुनको न्यूनचापीय क्षेत्र दक्षिणतिर रहेकाले अरब सागरबाट आउने जलवाष्पयुक्त हावाको प्रभावले नेपालका धेरै स्थानमा वर्षा भइरहेको छ। विशेषगरी सुदूरपश्चिम क्षेत्रमा भारी पानी परेको छ।
कञ्चनपुरको दोधारामा २४ घण्टामा १९९.२ मिलिमिटर वर्षा मापन भएको छ। डडेलधुराको जोगबुढा र गाइबन्डे, कास्कीको लुम्ले, तथा ताप्लेजुङको लाङटाङ र ताप्लेथोकमा अति भारी वर्षा रेकर्ड गरिएको छ। बरिष्ठ मौसमविद मानन्धरले सुदूरपश्चिममा थप वर्षाको सम्भावना रहेको जानकारी दिएकी छन्।
