- २८ श्रावण २०८३, बिहीबार / Aug 13, 2026
दोलखा, ६ साउन । दोलखाको गौरीशंकर गाउँपालिका–९ स्थित सिप्रिङ खोलामा मंगलबार राति आएको बाढीमा परेर एक जना बेपत्ता भएका छन् भने चार जना भीरमा फसेका छन्।
गौरीशंकर गाउँपालिका–९ का अध्यक्ष निमगेली शर्पाका अनुसार मुलखर्कस्थित सिप्रिङ खोला जलविद्युत् आयोजनाको बाँध क्षेत्रमा आएको बाढीमा चस्मान तामाङ बेपत्ता भएका हुन्। गोठ लिएर मुलखर्क पुगेका तामाङलाई गाईवस्तुसहित बाढीले बगाएको बताइएको छ।
बाढी आएपछि ज्यान जोगाउन भागेका सिप्रिङ खोला जलविद्युत् आयोजनाका चार कर्मचारी ओडारमा पुगे पनि अहिले भीरमा फसेर उद्धारको प्रतीक्षामा रहेका छन्।
उनीहरूको उद्धारका लागि नेपाली सेना, सशस्त्र प्रहरी बल र नेपाल प्रहरी परिचालन गरिएको प्रहरीले जनाएको छ। प्रतिकूल मौसम र कठिन भूगोलका कारण उद्धार कार्य चुनौतीपूर्ण बनेको छ। प्रशासनले नदी तथा खोलानाला आसपासका बासिन्दालाई उच्च सतर्कता अपनाउन आग्रह गरेको छ।
