- ६ श्रावण २०८३, बुधबार / Jul 22, 2026
काठमाडौं, ६ साउन । इरानसँग जारी सैन्य द्वन्द्वमा अमेरिकाले हालसम्म करिब ३७.५ अर्ब अमेरिकी डलर खर्च गरेको जनाएको छ। अमेरिकी रक्षामन्त्री पिट हेगसेथले सिनेटको विनियोजन (Appropriations) समितिमा बोल्दै यो जानकारी दिएका हुन्।
हेगसेथका अनुसार आवश्यक अतिरिक्त बजेट स्वीकृत नभए सैन्य तालिम, सैनिकको तयारी तथा अन्य महत्वपूर्ण रक्षा कार्यक्रम प्रभावित हुन सक्नेछन्। उनले अमेरिकी रक्षा मन्त्रालयका लागि कुल ८७ अर्ब अमेरिकी डलरको अतिरिक्त बजेट माग गरेका छन्।
प्रस्तावित बजेटमध्ये ६७ अर्ब डलर मध्यपूर्वमा जारी सैन्य परिचालन र अभियानका लागि खर्च गर्ने योजना रहेको जनाइएको छ।सिनेटमा भएको सुनुवाइका क्रममा युद्धविरोधी प्रदर्शनकारीहरूले बैठकमा पटक–पटक अवरोध गर्दै इरान र प्यालेस्टाइनमा बमबारी रोक्न माग गरेका थिए।
यो बजेट प्रस्ताव मध्यपूर्वमा हालै भएका आक्रमणमा तीन अमेरिकी सैनिकको मृत्यु भएपछि आएको हो। रक्षामन्त्री हेगसेथले अमेरिका आफ्ना रणनीतिक प्रतिद्वन्द्वीभन्दा कमजोर हुन नहुने भन्दै रक्षा क्षेत्रमा थप लगानी आवश्यक रहेको बताए।
उनले बजेट स्वीकृत नभए सैनिकको पारिश्रमिक, आवश्यक हतियार तथा गोलाबारुदको मौज्दात कायम राख्न र महत्वपूर्ण सैन्य अभियान सञ्चालन गर्न कठिनाइ हुने चेतावनी दिए।
यता विपक्षी डेमोक्र्याटिक पार्टीका सांसदहरूले भने प्रस्तावित बजेटको विरोध गरेका छन्। सिनेटर किर्स्टन गिलिब्रान्डले अमेरिकी नागरिक आर्थिक समस्यासँग जुधिरहेका बेला युद्धका लागि अर्बौं डलर थप माग्नु उचित नभएको टिप्पणी गरिन्। साथै, राष्ट्रपति डोनाल्ड ट्रम्पले युद्धमा सफलता हासिल भएको दाबी गरिरहेकै अवस्थामा थप बजेट किन आवश्यक परेको हो भन्ने प्रश्न पनि उठाइन्।
यसको जवाफमा रक्षामन्त्री हेगसेथले राष्ट्रिय सुरक्षाका लागि आवश्यक हतियार र स्रोतसाधन जुटाउन बजेट अपरिहार्य रहेको बताए।अमेरिकी रक्षा मन्त्रालयका अनुसार फेब्रुअरी २८ देखि सुरु भएको युद्धमा हालसम्म १८ अमेरिकी सैनिकको मृत्यु भइसकेको छ। साथै, अमेरिकी संसदको तल्लो सदन बिदामा जान लागेकाले पेन्टागनले माग गरेको बजेट स्वीकृत हुन अझै केही समय लाग्ने अनुमान गरिएको छ।
