शैक्षिक गतिविधिका लागि विदेशिनेले खर्चे खर्बौं रुपैयाँ

काठमाडौँ, भदौ ९ । देशभित्र उच्च शिक्षाका लागि विभिन्न विश्वविद्यालय तथा शैक्षिक संस्था संचालनमा रहेका भए पनि ठूलो रकम विदेशिने क्रम जारी छ। नेपाल राष्ट्र बैंकका अनुसार गत आर्थिक वर्ष २०८१÷८२ मा शिक्षाका लागि मात्रै १ खर्ब ३८ अर्ब ४८ करोड रुपैयाँ विदेशिएको छ। अघिल्लो वर्ष शिक्षाका लागि विदेशिएको रकम १ खर्ब २५ अर्ब १३ करोड रुपैयाँ थियो।

केन्द्रीय बैंकले जनाएको छ कि सेवा खाताअन्तर्गत भ्रमण व्यय १८.१ प्रतिशतले वृद्धि भई २ खर्ब २३ अर्ब ७२ करोड रुपैयाँ पुगेको छ। अघिल्लो वर्ष यो व्यय १ खर्ब ८९ अर्ब ४३ करोड रुपैयाँ थियो।

त्यसैगरी, आव २०८१÷८२ मा खुद सेवा आय ९० अर्ब ९४ करोड रुपैयाँ घाटामा रहेको छ, अघिल्लो वर्ष यो ५५ अर्ब ८६ करोड रुपैयाँ घाटामा थियो। समिक्षा वर्षमा सेवा खाताअन्तर्गत भ्रमण आयत ७.७ प्रतिशतले वृद्धि भई ८८ अर्ब ६६ करोड रुपैयाँ पुगेको छ। अघिल्लो वर्ष यस्तो आय ८२ अर्ब ३३ करोड रुपैयाँ रहेको थियो।