- ८ बैशाख २०८३, मंगलवार / Apr 21, 2026
काठमाण्डौ, २५ माघ । सरकारले आउँदो फागुन २१ गते हुने प्रतिनिधिसभा सदस्य निर्वाचनमा ड्रोनको प्रयोगलाई प्रतिबन्ध लगाएको छ । केन्द्रीय सुरक्षा समितिको निर्णयअनुसार निर्वाचन अवधिभर ड्रोन उडाउन नपाइने गृह मन्त्रालयले जनाएको छ ।
गृह मन्त्रालयका प्रवक्ता एवं सहसचिव आनन्द काफ्लेले निर्वाचनको सुरक्षा संवेदनशीलतालाई मध्यनजर गर्दै ड्रोन प्रयोगमा प्रतिबन्ध लगाउने निर्णय गरिएको जानकारी दिनुभयो । उहाँका अनुसार ड्रोनको दुरुपयोग हुनसक्ने जोखिमलाई ध्यानमा राख्दै यो कदम चालिएको हो ।
प्रवक्ता काफ्लेले पछिल्लो समय सामाजिक सञ्जालको दुरुपयोग बढ्दो क्रममा रहेकाले त्यसलाई नियन्त्रण गर्न नेपाल प्रहरीले सञ्चालनमा ल्याएको अध्याधुनिक युनिटलाई थप प्रभावकारी बनाइने पनि बताउनुभयो ।
गृह मन्त्रालयले निर्वाचनलाई लक्षित गर्दै सबै सुरक्षा संयन्त्र तथा प्रशासनिक निकायलाई कुनै पनि प्रकारको कमीकमजोरी नगरी चुस्त र प्रभावकारी सुरक्षा व्यवस्थापनमा जुट्न निर्देशन दिएको छ ।
त्यसैगरी मन्त्रालयले सामाजिक सञ्जाल प्रयोग गर्दा जिम्मेवार हुन सबैलाई अनुरोध गर्दै मित्थ्या, भ्रमपूर्ण, घृणात्मक तथा कसैलाई लाञ्छना लगाउने सामग्री प्रकाशन वा प्रसारण नगर्न चेतावनी दिएको छ । यस्ता गतिविधिमा संलग्न भएमा कानुनअनुसार कारबाही गरिने पनि मन्त्रालयले स्पष्ट पारेको छ ।
