- १५ जेष्ठ २०८३, शुक्रबार / May 29, 2026
मुख्य बुँदा
सिभिल मलको ‘द टोय स्टोर’बाट ६ थान नक्कली पेस्तोल बरामद
काभ्रे घर भएका ३१ वर्षीय सुरज मगर पक्राउ
आरोपीले ५ सय १ रुपैयाँमा आयात गरी १४–१९ हजारमा बिक्री
अनुसन्धानमा हतियारको तौल वास्तविक पेस्तोलसँग मिल्दोजुल्दो रहेको पाइएको
आरोपीविरुद्ध अभद्र व्यवहार कसुरमा ५ दिन म्याद
काठमाडौँ, ६ भद्र । काठमाडौँ प्रहरीले सुनधारा स्थित सिभिल मलबाट ६ थान नक्कली पेस्तोल बरामद गरेको छ। जिल्ला प्रहरी परिसर काठमाडौँका एसपी अपिल बोहराका अनुसार, सिभिल मलको पाँचौँ तलामा सन्तोषी श्रेष्ठले सञ्चालन गरेको ‘द टोय स्टोर’ बाट अटोमेटिक पेस्तोल जस्तो देखिने नक्कली हतियार बरामद गरिएको हो।
प्रहरी वृत्त जनसेवाबाट खटिएको टोलीले काभ्रेको रोशी घर भएका ३१ वर्षीय सुरज मगरलाई हतियार आयात र बिक्री गरेको आरोपमा पक्राउ गरेको छ। बिहीबार पक्राउ गरी आरोपीविरुद्ध अभद्र व्यवहार सम्बन्धी कसुरमा ५ दिन म्याद लिएर अनुसन्धान भइरहेको एसपी बोहराले जानकारी दिए।
प्रहरीको अनुसन्धान अनुसार, आरोपीले सो हतियार नेपाली रुपैयाँ ५ सय १ मा आयात गरी १४ देखि १९ हजार रुपैयाँसम्ममा बिक्री गर्दै आएको पाइएको छ। नक्कली भए पनि सो हतियारको तौल वास्तविक पेस्तोलसँग मिल्दोजुल्दो रहेको अनुसन्धानमा संलग्न अधिकृतहरूले बताएका छन्।
