मकलबाट सल्कीएको आगोले बर्दियामा एकै परिवारका ४ जनाको ज्यान गयो

काठमाडौं । आगलागीको घटनाबाट बर्दियामा एकै घरका चार जनाको ज्यान गएको छ । बर्दियाको गुलरिया–४ स्थित तुलापुरस्थित भरत चन्दको घरमा आगलागी हुँदा एकै परिवारका चारजनाको मृत्यु भएको हो । आगलागीबाट तीन बालबालिकासहित चार जनाको मृत्यु भएको जिल्ला प्रहरी कार्यालय बर्दियाले जनाएको छ ।

आगलागीमा परी भरत चन्दका दुई छोरा आठ वर्षीय कृष र दुई वर्षीय कार्तिकको मृत्यु भएको र उनकी दिदी ३५ वर्षीय राधा बुढा र भाञ्जी मानुषीको पनि मृत्यु भएको जिल्ला प्रहरी कार्यालयले जनाएको छ । चिसोका कारण बालेर कोठामा छाडिएको मकलबाट बिछ्यौना हुँदै आगो सल्किएको र आगलागीबाट भरतकी २८ वर्षीया श्रीमती करिश्मा घाइते भएकी छिन्।

उनलाई उपचारका लागि गुलरिया अस्पताल लगिएको छ। शुक्रबार राति ११ बजेतिर चन्दको घरमा आगलागी भएको र आगलागीबाट घरको एउटा कोठामा पूरै क्षति भएको प्रहरीले जनाएको छ ।