गाँजा ओसार्ने दुई जना पक्राउ

बारा । ट्रकमा लागूऔषध गाँजा ओसारेर तस्करी गर्ने दुई जना पक्राउ परेका छन् ।

ट्रकसहित पक्राउ पर्नेमा चालक मकवानपुरको मनहरी गाउँपालिका–२ स्थायी घर भई हाल बाराको जितपुरसिमरा उपमहानगरपालिका वडा नम्बर २ का ३२ वर्षीय आकाश भन्ने दीपक कोइराला र ट्रकमा सवार हेटौंडा १३ पदमपोखरीका ३० वर्षीय जीवन घलान रहेका छन् ।

रतनपुरबाट निजगढतर्फ जाँदै गरेको ना ५ ख ७५५२ नम्बरको ट्रकलाई निजगढ नगरपालिका १० लालपार्कस्थित सडकमा सोमबार राति प्रहरीले रोकेर चेकजाँच गरेको थियो। उक्त ट्रकमा ७ वटा ठूला पोकामा रहेको दुई क्वीन्टल १६ केजी गाँजा भेटिएपछि प्रहरीले

ट्रक चालक कोइराला र घलान दुवै जनालाई नियन्त्रणमा लिएको बाराका प्रहरी नायब उपरीक्षक दधिराम न्यौपानेले जानकारी दिए। उक्त ट्रकपनि नियन्त्रणमा लिइएको न्यौपानेले बताए ।