- २३ बैशाख २०८३, बुधबार / May 6, 2026
मुख्य बुँदा:
संयुक्त राष्ट्रसंघ (यूएन) र सहायताकर्मी संस्थाले गाजामा भोकमरी भयावह बनेको चेतावनी
गाजाको उत्तर–मध्य भागमा भोकमरी पुष्टि, अर्को महिनाभित्र देइर अल–बलाह र खान युनिससम्म फैलिने अनुमान
हाल पाँच लाखभन्दा बढी मानिस भोक, अभाव र जीवन जोखिममा
सेप्टेम्बरको अन्त्यसम्म ६ लाख ४० हजारभन्दा बढी प्रभावित हुने आँकलन
पाँच वर्षमुनिका १ लाख ३२ हजार बालबालिका गम्भीर कुपोषणको जोखिममा
युद्ध शुरू भएयता भोकमरीका कारण ३१३ जनाको मृत्यु, जसमा ११९ बालबालिका
काठमाडौँ, १२ भाद्र । इजरायली नाकाबन्दीका कारण गाजामा मानवीय सङ्कट दिन प्रतिदिन गम्भीर बन्दै गएको छ। संयुक्त राष्ट्रसंघ (यूएन) र सहायताकर्मी संस्थाहरूले गाजामा भोकमरी भयावह स्तरमा पुगेको भन्दै चेतावनी दिएका छन्।
हिजो यूएन सुरक्षा परिषदलाई सम्बोधन गर्दै यूएनका सहायक मानवीय प्रमुख जोय्स मुसुयाले गाजाको उत्तर–मध्य भागमा भोकमरी पुष्टि भएको र अर्को महिनाको अन्त्यसम्म देइर अल–बलाह र खान युनिससम्म फैलिन सक्ने अनुमान गरिएको बताए।
अहिले पाँच लाखभन्दा बढी मानिस भोक, अभाव र जीवन जोखिममा रहेको अन्तर्राष्ट्रिय समाचार संस्था अलजजिराले जनाएको छ। यो सङ्ख्या सेप्टेम्बरको अन्त्यसम्म ६ लाख ४० हजार नाघ्ने अनुमान गरिएको छ। जसमा पाँच वर्षमुनिका १ लाख ३२ हजार बालबालिका गम्भीर कुपोषणको उच्च जोखिममा छन्।
गाजाको स्वास्थ्य मन्त्रालयका अनुसार हिजो मात्र १० जनाको मृत्यु भोकमरी र कुपोषणका कारण भएको छ। युद्ध शुरू भएयता भोकमरीकै कारण ३१३ जनाले ज्यान गुमाइसकेका छन्, जसमा ११९ जना बालबालिका रहेका छन्।
सहायताकर्मी संस्थाहरूले तत्काल मानवीय पहुँच सुनिश्चित गर्न र नाकाबन्दी हटाउन आग्रह गरेका छन्, अन्यथा गाजामा मृत्यु दर अझै बढ्ने चेतावनी दिइएको छ।
