- २७ जेष्ठ २०८३, बुधबार / Jun 10, 2026
भक्तपुर, १२ भाद्र । घ्याम्पेडाँडा–रानीकोट हुँदै काभ्रेको पनौती जाने सडक फेरि पहिरोले थुनिएको छ । वर्षायाम सुरु भएदेखि नै यो सडक दैनिकजसो अवरुद्ध हुँदा स्थानीयबासी, किसान र पर्यटक सबै समस्यामा परिरहेका छन् ।
रानीकोटलाई राजधानी नजिकैको उदीयमान पर्यटकीय गन्तव्य मानिन्छ । यसैगरी यो बाटो भक्तपुर हुँदै पनौती जाने सबैभन्दा छोटो र सहज मार्ग पनि हो । तर, बारम्बारको पहिरो र अव्यवस्थित खानेपानी पाइपका कारण सडक प्रायः बिग्रँदै जाने गरेको छ ।
तरकारी, दूध, अन्नपात बजार पुर्याउन किसानलाई धौ–धौ परेको छ । मोटरसाइकल र साना गाडीसमेत पहिरो काटेर जान नसक्ने अवस्था हुँदा यात्रुहरू बीचमै रोकिएका छन् । स्थानीय मन नारायण श्रेष्ठ भन्छन्, “यो सडकमा नाला नहुँदा थोरै पानी परे पनि ठूलो क्षति हुन्छ । सरकारले बजेट छुट्याएको सुनेका छौं तर काम अघि बढेको छैन ।”
पर्यटन व्यवसायी रामसुन्दर बके त आफ्नै खर्चमा पटक–पटक डोजर लगाएर पहिरो पन्छाउँदै आएका छन् । उनी भन्छन्, “खानेपानीको पाइप फुटेर बाटो थप कमजोर भएको छ । कुनै पनि बेला ठूला दुर्घटनाको खतरा बढिरहेको छ ।”
यस सडकमार्गमा दैनिकजसो राजधानी, पनौती र आसपासका क्षेत्रमा आवतजावत गर्ने सयौं यात्रु छन् । तर, बाटो बन्द हुँदा उनीहरूको रोजगारीदेखि व्यापारसम्म प्रभावित भइरहेको छ ।
स्थानीय सडक उपभोक्ता समितिले तत्काल र दीर्घकालीन समाधानका लागि तीनै तहका सरकारलाई पहल गर्न आग्रह गरेको छ । करिब दुई किलोमिटर सडकलाई स्तरोन्नति गरी नाला व्यवस्थापन गर्न सके समस्या न्यून हुने उनीहरूको धारणा छ ।
अहिलेसम्म सडक खुलाउन तत्काल राहतस्वरूप स्थानीयबासी, किसान र उपभोक्ताहरू स्वयं दर्जनौंको संख्यामा जुटेर पहिरो पन्छाउने काममा सक्रिय रहेका छन् । उनीहरू भन्छन् “सरकार बेपर्वाह रह्यो भने हरेक वर्ष हामीले आफ्नै बलबुतामा पहिरो हटाउँदै बस्नुपर्ने हुन्छ ।”
