बिहीबारको संसदमा विवाद भएपछि सत्ता र प्रतिपक्षबीच दुरी बढ्यो

काठमाण्डौ । प्रमुख प्रतिपक्षी कांग्रेसले संसदीय छानबिन समिति गठनको माग गर्दै संसद बैठक अवरुद्ध गरेको छ । संसदमा बिहीबारसत्तापक्ष र प्रतिपक्षका सांसदहरुबीच तनाव भएपछि छानविन समिति बनाउने विषय झन पेचिलो बन्दै गएको हो ।

संसदमा तनावको स्थिति बन्नुमा सत्तापक्ष र प्रतिपक्षले एक–अर्कालाई दोष लगाएका छन् । कांग्रेसका सांसदहरुले नाराबाजी गरिरहेको बेला सभामुख देवराज घिमिरेले संसदलाई कार्यसूचीमा अगाडि बढाएपछि विवाद सिर्जना भएको हो ।

उपप्रधान एवम् गृहमन्त्री रवि लामिछानेलाई बोल्न समय दिएपछि संसदमा तनावको अवस्था आएको प्रमुख प्रतिपक्षको आरोप रहेको छ । बिहीबार संसद बैठक बस्नुअघि यस विषयमा दलहरु सहमतिको नजिक पुगेको भनिए पनि त्यसपछि संसदमा भएको तनावले अविश्वास बढाएको छ । राष्ट्रिय स्वतन्त्र पार्टीले अब संसदीय समिति गठन नहुने घोषणा गरेको छ ।