काठमाडौं, ५ साउन । सरकारले कर प्रणालीलाई थप प्रभावकारी बनाउँदै उपभोक्तालाई बिल लिन प्रोत्साहन गर्न ‘करदाता प्रोत्साहन उपहार सञ्चालन कार्यविधि–२०८३’ कार्यान्वयनमा ल्याएको छ।
कार्यविधिअनुसार कर प्रणालीमा आबद्ध उपभोक्ताले अब एक लाख ३३ हजार ३३४ रुपैयाँदेखि १० लाख रुपैयाँसम्म नगद उपहार जित्न सक्नेछन्। अर्थ मन्त्रालयले कार्यविधि स्वीकृत गरेपछि आन्तरिक राजस्व विभागले उपहार कार्यक्रम सञ्चालन गर्ने भएको हो।
विभागले हरेक महिनाको १ गते र १६ गते स्वचालित तथा पारदर्शी प्रणालीमार्फत विजेता छनोट गर्नेछ। प्रत्येक दिनका लागि एक जना विजेता र प्रत्येक १५ दिनमा एक जना बम्पर विजेता चयन गरिने व्यवस्था गरिएको छ।
कार्यविधिअनुसार दैनिक विजेताले एक लाख ३३ हजार ३३४ रुपैयाँ प्राप्त गर्नेछन् भने १५ दिनमा छनोट हुने बम्पर विजेताले १० लाख रुपैयाँ नगद पुरस्कार पाउनेछन्। यद्यपि, आयकर ऐनबमोजिम आकस्मिक लाभमा लाग्ने २५ प्रतिशत कर कट्टा गरी बाँकी रकम मात्र भुक्तानी गरिनेछ।
यस योजनामा मूल्य अभिवृद्धि कर (भ्याट) र स्थायी लेखा नम्बर (प्यान) मा आबद्ध विक्रेताबाट १०० रुपैयाँभन्दा बढीको सामान वा सेवा खरिद गरी अनलाइन वा नगद भुक्तानीसँगै सक्कली बिल लिने नेपाली नागरिक सहभागी हुन सक्नेछन्।
तर, व्यवसायिक प्रयोजनका लागि गरिएका खरिद, सरकारी निकायका बिल, टेलिफोन, विद्युत्, सवारीसाधन तथा हवाई टिकटसम्बन्धी कारोबार भने यो उपहार कार्यक्रममा समावेश गरिने छैन।
विजेता छनोट भएपछि आन्तरिक राजस्व विभागले सम्बन्धित व्यक्तिलाई मोबाइल वा इमेलमार्फत जानकारी गराउनेछ। साथै, विजेताको नाम विभागको वेबसाइट तथा सामाजिक सञ्जालमार्फत सार्वजनिक गरिनेछ।
सरकारले यो कार्यक्रममार्फत उपभोक्तालाई अनिवार्य रूपमा बिल लिन प्रोत्साहित गर्दै कर छली नियन्त्रण, राजस्व संकलनमा वृद्धि तथा कर प्रणालीमा पारदर्शिता कायम हुने विश्वास लिएको छ।
