स्थगित कक्षा १२ को मौका परीक्षा असोज ७ र ८ गते हुने

काठमाडौं, १ असोज । स्थगित गरिएको कक्षा १२ को मौका (पूरक) परीक्षाको नयाँ तालिका सार्वजनिक भएको छ। यसअघि भदौ २८ र २९ गतेका लागि तय गरिएको परीक्षा जेनजी आन्दोलन हिंसात्मक भएपछि स्थगित गरिएको थियो।

राष्ट्रिय परीक्षा बोर्डको परीक्षा नियन्त्रण कार्यालय कक्षा ११ र १२ ले संशोधित तालिका सार्वजनिक गर्दै नयाँ परीक्षा मिति असोज ७ र ८ गते तोकेको छ।

परीक्षाको विवरण यस प्रकार छ : असोज ७ गते (पहिलो दिन), अनिवार्य अंग्रेजी (००४१), एक विषयमा मात्र परीक्षा दिने विद्यार्थीका लागि सबै विषय, दुई विषयमा परीक्षा दिने विद्यार्थीका लागि सानो कोड भएको विषय, अंग्रेजी र नेपाली दुवै विषय दिने विद्यार्थीले पहिलो दिन अंग्रेजीको परीक्षा दिनुपर्नेछ।

असोज ८ गते (दोस्रो दिन), दुई विषयमा परीक्षा दिने विद्यार्थीका लागि ठूलो कोड भएको विषय, यस दिन अनिवार्य अंग्रेजीको परीक्षा हुने छैन (अंग्रेजी ७ गते नै हुनेछ)।