- २ भाद्र २०८३, मंगलवार / Aug 18, 2026
म्याग्दी । पुल निर्माण भएपछि स्थानीय मात्रै होइन पदमार्गमा हिड्ने यात्रीहरुमा समेत खुशीयाली छाएको छ । म्याग्दीको धवलागिरि गाउँपालिका–३ मुनाको बाङखोलामा पुल निर्माण भएपछि स्थानीय मात्रै नभई पदयात्री समेत खुशी भएका हुन ।
बर्खायाममा जोखिम मोलेर खोला वारपार गर्नुपर्ने समस्या हटेपछि खुशी छाएको हो । छोटो घाट भएको ठाउँमा छिटो बनाउनुपर्ने भएकाले खोलाको दायाँबायाँ मेसिनरी पर्खाल उठाएर फलाम जोडेर कल्भर्ट प्रविधिको पुल निर्माण गरिएको हो। पुल बनेपछि बर्खायाममा बाङखोलाको उर्लँदो भेलमा जोखिम मोलेर वारपार गर्नुपर्ने बाध्यता हटेको छ।
धवलागिरि गाउँपालिकाले १२ लाख रुपैयाँ बजेटबाट तल्लो बाङखोलामा १२ मिटर र उपल्लो बाङखोलामा नौ मिटर लामो फलामे पुल निर्माण गरेको हो।
गत साउनमा बाङखोलामा आएको बाढीले झोलुङ्गे पुल बगाएपछि मुना हुँदै लुलाङ–गुर्जा, ढोरपाटन जाने पदमार्गमा आवतजावतमा समस्या भएको थियो।
उपभोक्ता समितिमार्फत कल्भर्ट पुल निर्माण भएपछि तीनवटा वडाका बासिन्दाका साथै, ढोरपाटन गुरिल्ला र डोल्पा पदमार्ग भ्रमणमा आउने पर्यटकलाई सहज भएको धवलागिरि –३ वडाले जनाएको छ ।
५० किलोवाट क्षमताको दरखोला पहिलो लघुजलविद्युत् परियोजनाबाट ५८० घरपरिवार लाभान्वित भएका छन्। बाङखोलाको बाढीले बगाएको मुनाको दरखोला पहिलो लघुजलविद्युत् परियोजनाको पाइपलाइन पुनर्निर्माण गरिएको छ। गाउँपालिकाले विनियोजन गरेको रु आठ लाख बजेटबाट बाङखोला माथि फलामको पुल बनाएर पोलिथिन पाइप राखेर पानी तार्ने व्यवस्था मिलाएको छ ।
