- ८ श्रावण २०८३, शुक्रबार / Jul 24, 2026
मकवानपुर, २१ मंसिर । हेटौँडा बजार क्षेत्रअन्तर्गत राजमार्गको सीमा अतिक्रमणमा परेको भन्दै ५ सयभन्दा धेरै घर तथा संरचना भत्काइएको छ ।
मेनरोड, राप्तीरोड, एचआइडी, चौकिटोललगायत स्थानका घर–टहरा हिजो एकै दिन डोजर चलाएर हटाइएका हुन् ।
सडक फराकिलो बनाउने उद्देश्यसहित कडा सुरक्षा घेरामा सडक डिभिजन कार्यालय हेटौँडा र जिल्ला प्रशासन कार्यालय मकवानपुरको सक्रियतामा पूर्व–पश्चिम राजमार्ग तथा त्रिभुवन राजपथ विस्तारको काम अघि बढाइएको हो ।
यसअघि सडक डिभिजनले मंसिर ५ गते महेन्द्र राजमार्गको रातोमाटे–बुद्धचोक–राप्ती पुल खण्ड र त्रिभुवन राजपथको बुद्धचोक–सामरी पुल खण्डसम्मका अतिक्रमित संरचना हटाउन १५ दिने सूचना जारी गरेको थियो ।
सूचना अनुसार शुक्रवार समयसीमा सकिएलगत्तै हिजो बिहानदेखि घर–टहरा भत्काउने काम सुरु गरिएको हो । तर, सोही सूचनाविरुद्ध परेको रिटमा सर्वोच्च अदालतले शुक्रवार ‘‘सूचना कार्यान्वयन नगर्नू, नगर्न लगाउनू’’ भनी अल्पकालीन अन्तरिम आदेश जारी गरेको थियो ।
सर्वोच्चको आदेश आएपनि भोलिपल्टै प्रशासन र सडक डिभिजनले अतिक्रमणमुक्त गर्ने भन्दै घर–टहरा भत्काएको विषयले स्थानीयमा चर्को असन्तुष्टि पैदा भएको छ ।
प्रभावितहरूले सरकारले कानुनी प्रक्रिया बेवास्ता गर्दै मनोमानी ढंगले संरचना भत्काएको आरोप लगाएका छन् । प्रशासनले भने आदेश आफूहरूले समयमा नपाएको दाबी गरेको छ ।
