- ५ आश्विन २०८३, सोमबार / Sep 21, 2026
भक्तपुर । ८४ बर्षिया एक बृद्धाले सामाजिक कार्यमा आफ्नो हात अगाडी बढाएकी छन् । चाँगुनारायण नगरपालिका वडा नं ९ खड्काटोल निवासी हित कुमारी खड्काले नाम जस्तै काम गरेकी छन् ।
ताथलीमा सञ्चालन रहेको छोरीको घर ज्येष्ठ नागरिक आश्रमको सहयोगार्थ आयोजित महायज्ञमा ज्येष्ठ नागरिक आश्रम निर्माणसंगै निःशुल्क एम्बुलेन्स सञ्चालन गर्ने महत्वपूर्ण उद्देश्यमा एम्बुलेन्स खरिदका लागि रु १० लाख र आश्रम निर्माणका लागि रु १ लाख ११ हजार १ सय ११ सहयोग गर्ने निर्णयले हितकुमारीको चर्चा चलेकाे छ ।
गाउँघरमा एम्बुलेन्स नभएकाले बेलाबेलामा बिरामीले पाएको दुःखबारे नजिकैबाट अध्ययन गरिरहेकी हितकुमारीलाई एम्बुलेन्स सञ्चालन गर्ने चाहानामा सहयोग गर्न तीन छोराहरुले साथ दिएका छन् । आश्रमबाट सञ्चालन हुने निःशुल्क एम्बुलेन्स खरिदका लागि परिवारको सहयोग पाउँदा गदगद भएकी मनकारी हितकुमारीको चाहना पुरा हुने भएको छ ।
साामाजिक क्षेत्रमा हात अगाडी बढाउँदै आएको खड्का परिवारलाई आमाको प्रस्ताव चित्त बुझ्याे । श्रीकण्ठ खड्का, जनार्दन खड्का र पवन खड्काको संयुक्त सहयोगमा आमा हितकुमारीले गरेकाे निर्णयले सामाजिक उचाइ चुम्ने कार्य गरेकाे भन्दै चर्चा चल्न थालेकाे छ ।
यता उनको सहयोगको प्रसंसा गर्दै ज्येष्ठ नागरिक आश्रमका अध्यक्ष वालयोगेश्वर विजयमूर्ति महाराजले एम्बुलेन्स खरिद गरि चालक खर्च र तेल खर्च आश्रमले नै ब्यहोर्ने बताएका छन् । निःशुल्क सञ्चालन हुने उक्त एम्बुलेन्सले भक्तुर जिल्लाबासीको लागि निःशुल्क सेवा प्रदान गर्ने भनाई छ ।
छोरीको घर जेष्ठ नागरिक आश्रमको लागि जग्गा खरिद गरि भवन निर्माण सहयोगार्थ गत आश्विन ११ गते देखि महायज्ञ सञ्चालन भैरहेको छ । महायज्ञ आगामी २७ गतेसम्म सञ्चालन हुने आयोजकले जनाएको छ ।
