- ६ जेष्ठ २०८३, बुधबार / May 20, 2026
सुर्खेत, ६ जेठ । हुम्लाको चंखेली गाउँपालिका–५ स्थित नेप्का गाउँमा गएराति आएको बाढीले विद्यालय भवन, गोठ तथा भेडाबाख्रा पुरिएको प्रारम्भिक विवरण आएको छ । भीषण वर्षापछि आएको बाढीका कारण गाउँमा ठूलो धनमालको क्षति भएको स्थानीय प्रशासनले जनाएको छ ।
जिल्ला प्रहरी कार्यालय हुम्लाका प्रहरी प्रमुख प्रहरी नायव उपरीक्षक शंकर खड्काका अनुसार मंगलबार राति करिब पौने ११ बजेतिर भारी वर्षापछि बाढी आएको हो । बाढीले स्थानीय विद्यालय भवन, भेडाबाख्राका गोठ तथा खेतीयोग्य जमिनमा क्षति पुर्याएको प्रारम्भिक जानकारी प्राप्त भएको उनले बताए । ‘नेप्का गाउँ सदरमुकामबाट निकै टाढा र मुगुसँग सिमाना जोडिएको विकट बस्ती हो,’ उनले भने, ‘अहिलेसम्म प्राप्त विवरणअनुसार विद्यालय भवन, गोठ र खेतीयोग्य जमिन पुरिएको छ । केही घरमा पनि आंशिक क्षति पुगेको खबर आएको छ ।’
घटनामा हालसम्म मानवीय क्षति नभएको र स्थानीय बासिन्दा सुरक्षित रहेको जानकारी प्राप्त भएको प्रहरीको भनाइ छ । यद्यपि, सडक पहुँच नपुगेको विकट भूगोल भएका कारण घटनाको पूर्ण विवरण आउन बाँकी रहेको छ ।
प्रहरीका अनुसार बुधबार बिहानै प्रहरी टोली घटनास्थलतर्फ परिचालन गरिएको छ । सदरमुकामबाट करिब पाँच घण्टा सवारी यात्रा र त्यसपछि करिब छ घण्टाको पैदल दूरी पार गरेपछि मात्रै नेप्का पुग्न सकिने भएकाले उद्धार तथा अनुगमनमा समय लाग्ने भएको हो ।
चंखेली गाउँपालिकाका अध्यक्ष प्यारीलाल शाहीले बाढीका कारण चारवटासम्म गोठ पुरिएको र ६० भन्दा बढी भेडाबाख्रा हराएको जानकारी दिए । साथै, एउटा विद्यालय भवनमा पनि क्षति पुगेको उनले बताए ।
‘अन्य ठाउँमा खासै पानी परेको थिएन, हावाहुरी मात्रै चलेको थियो,’ अध्यक्ष शाहीले भने, ‘तर नेप्का क्षेत्रमा मात्रै केन्द्रित भएर ठूलो वर्षा र असिना परेको देखिन्छ ।’ स्थानीय तहका अनुसार घटनाको विस्तृत क्षति विवरण संकलन कार्य जारी छ । दुर्गम भूगोलका कारण प्रहरी र जनप्रतिनिधिलाई घटनास्थल पुग्न अझै समय लाग्ने बताइएको छ ।
