- २६ असार २०८३, शुक्रबार / Jul 10, 2026
काठमाडौं, ६ जेठ । सुदूरपश्चिम र लुम्बिनी प्रदेशका तराई भू–भागमा बुधबार अत्यधिक गर्मी हुने भएको छ । मौसम पूर्वानुमान महाशाखाका अनुसार पश्चिमी तराईका अधिकांश जिल्लामा दिउँसोको समयमा तापक्रम उल्लेख्य रूपमा बढ्नेछ भने कडा घामका कारण ‘तातो दिन’ महसुस हुने अवस्था रहनेछ ।
आज सबैभन्दा बढी तापक्रम धनगढीमा मापन हुने अनुमान गरिएको छ । महाशाखाका अनुसार धनगढीको अधिकतम तापक्रम ३९ देखि ४१ डिग्री सेल्सियससम्म पुग्न सक्नेछ । यस्तै नेपालगञ्जमा ३८ देखि ४० डिग्री, दिपायलमा ३७ देखि ३९ डिग्री तथा भैरहवा र वीरेन्द्रनगरमा ३६ देखि ३८ डिग्री सेल्सियससम्म तापक्रम पुग्ने सम्भावना रहेको छ ।
यी क्षेत्रमा वर्षाको सम्भावना न्यून रहेकाले दिउँसोको समयमा गर्मी अझ बढी महसुस हुने मौसमविद्ले बताएका छन् । अत्यधिक गर्मीका कारण विशेषगरी बालबालिका, ज्येष्ठ नागरिक तथा दीर्घरोगीलाई सतर्कता अपनाउन सुझाव दिइएको छ ।
यता देशका पहाडी तथा पूर्वी भू–भागमा भने मौसम आंशिकदेखि सामान्य बदली रहनेछ । काठमाडौं, पोखरा, सिमरा, ओखलढुङ्गा, धनकुटा, विराटनगर, धरान, जिरी र ताप्लेजुङ लगायतका क्षेत्रमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ ।
विशेषगरी ओखलढुङ्गा, धनकुटा र ताप्लेजुङ क्षेत्रमा दिउँसो मध्यम वर्षाको सम्भावना करिब ४० प्रतिशतसम्म रहेको बताइएको छ । राजधानी काठमाडौंको अधिकतम तापक्रम भने आज २७ देखि २९ डिग्री सेल्सियसको बीचमा रहने अनुमान छ ।
आज राति पनि सुदूरपश्चिमका डडेल्धुरा, दिपायल र धनगढी लगायतका क्षेत्रमा मौसम मुख्यतया सफा रहनेछ । तर मध्य तथा पूर्वी भेगका धेरै स्थानमा आंशिक बदलीसहित मेघगर्जन र चट्याङ्गको सम्भावना कायम रहने मौसमविद्ले बताएका छन् ।
पोखरा, सिमरा, विराटनगर, धरान, जनकपुर, धनकुटा र ताप्लेजुङ लगायतका क्षेत्रमा रातिको समयमा समेत हल्का वर्षा हुन सक्ने पूर्वानुमान गरिएको छ । हिमाली जिल्ला जोमसोम र जुम्लामा भने मौसम आंशिकदेखि सामान्य बदली रहनेछ ।
