- २९ श्रावण २०८३, शुक्रबार / Aug 14, 2026
सिमकोट, २ असार । हुम्लाको सर्केगाड गाउँपालिका–३ स्थित उनापानीको औल बस्तीमा गएराति भएको भीषण आगलागीबाट आठ घर पूर्ण रूपमा जलेर नष्ट भएका छन्।
स्थानीय वासिन्दा विर्ख रावतको घरको गोठबाट सुरु भएको आगो अहिले बिहानसम्म पनि पूर्ण रूपमा नियन्त्रणमा आउन सकेको छैन। आगो लाग्नेबित्तिकै सर्केगाड प्रहरी चौकीबाट प्रहरी निरीक्षक सुविन शाहको नेतृत्वमा प्रहरी टोली घटनास्थल पुगेर आगो नियन्त्रणमा जुटिरहेको जिल्ला प्रहरी कार्यालय हुम्लाका प्रहरी नायब उपरीक्षक शंकर पोखरेलले जानकारी दिए।
पीडित स्थानीय धनबहादुर रावतका अनुसार आगलागीबाट विजन फडेरा, धनबहादुर रावत, जनक रावत, विर्ख रावत, पाले फडेरा, लालकौरा फडेरा, दुधशिला फडेरा र बाटुल्ली फडेराको घर पूर्ण रूपमा जलेर नष्ट भएका छन्।
आगलागीले घरभित्र रहेको अन्नपात, भाँडाकुँडा, लुगाफाटा, नागरिकता, लालपुर्जा, अन्य महत्वपूर्ण कागजात तथा नगद समेत जलेको छ। यद्यपि, मानवीय क्षति भने नभएको प्रहरीले जनाएको छ।
प्रहरीका अनुसार आगो पूर्णरूपमा नियन्त्रणमा आएपछि मात्र क्षतिको विस्तृत विवरण संकलन गरिनेछ। स्थानीयवासी तथा सुरक्षाकर्मीको सक्रियतामा आगो नियन्त्रणको प्रयास जारी छ।
