- २९ असार २०८३, सोमबार / Jul 13, 2026
काठमाण्डौ, २ असार । देशका केही भू-भागमा मनसुनी र पश्चिमी वायुको प्रभावसँगै वर्षा भइरहेको छ भने केही स्थानमा ठूलो पानी पर्ने सम्भावना रहेको मौसम पूर्वानुमान महाशाखाले जनाएको छ।
हाल सुदूरपश्चिम र कर्णाली प्रदेशका जिल्लाहरू दार्चुला, अछाम, बैतडी, डडेलधुरा, कञ्चनपुर, डोटी, बाँके, बर्दिया, सुर्खेत, कैलाली लगायतका ठाउँमा सामान्य वर्षा भइरहेको छ।
मौसम महाशाखाका अनुसार कोशी, मधेश, बागमती, गण्डकी तथा लुम्बिनी प्रदेशको पूर्वी भागमा पनि मनसुनी वायुको आंशिक प्रभाव रहेको छ। पश्चिमी वायु र स्थानीय वायुले देशको पश्चिम भूभागमा थप प्रभाव पारेको महाशाखाले जनाएको छ।
आज दिनभरि कोशी, बागमती, गण्डकी र लुम्बिनी प्रदेशका केही स्थानहरूमा मेघगर्जन, चट्याङसहित हल्कादेखि मध्यम वर्षा हुने सम्भावना छ। लुम्बिनीका केही, र कोशी, मधेश, बागमती, गण्डकी तथा सुदूरपश्चिमका एक–दुई स्थानमा ठूलो वर्षा हुने सम्भावना रहेको छ।
मौसम महाशाखाले जलवायु परिवर्तनको प्रभाव तथा निरन्तर वर्षाको सम्भावनालाई ध्यानमा राख्दै सतर्कता अपनाउन सर्वसाधारणलाई आग्रह गरेको छ। बाढी र पहिरोको जोखिम रहेका क्षेत्रमा विशेष सावधानी अपनाउन भनिएको छ।
