बाढी प्रभावित क्षेत्रमा सूर्यविनायक नगरपालिकाका जनप्रतिनिधिद्वारा स्थलगत अवलोकन, पीडितलाई नगरले सक्दो सहयोग गर्ने

भक्तपुर । भक्तपुरको सूर्यविनायक नगरपालिकाका जनप्रतिनिधिले बाढी प्रभावित क्षेत्रको स्थलगत अवलोकन गरेका छन् । असोज १०, ११ र १२ गतेको अविरले वर्षाका कारण प्रभावित सबै वडाको सोमबार नगरपालिकाका जनप्रतिनिधिहरुले अवलोकन गरेका हुन ।

जनप्रनिधिहरुको टोलीले नगरका १० वटै वडाको अवलोन गरेको सूर्यविनायक नगरपालिकाका नगर प्रवक्ता तथा वडा नं ७ का अध्यक्ष रविन्द्र सापकोटाले जानकारी दिनुभयो । उहाँले नगरप्रमुख बासुदेव थापाको नेतृत्वमा उपप्रमुख सरिता तिमिल्सीना भट्टराई, १० वटै वडाका वडाध्यक्षहरु र प्राविधिकको टोलीले अवलोकन गरेको बताउनुभयो ।

बाढी पहिरोले आवास, सडक, पुल लगायतका भौतिक संरचनामा पनि नोक्सानी पुर्याएको छ । लगातार तीन दिनसम्म भएको वर्षा पछि आएको पहिरोमा परि नगरपालिकामा ५ जनाको मृत्यु भएको छ ।