अमेरिकाभित्र राजनीतिक विवाद,थप सैन्य सहयोग गर्न जेलेन्स्कीको हारगुहार

एजेन्सी । अमेरिकासँग थप सैन्य सहयोगका लागि युक्रेनी राष्ट्रपति भोलोडिमिर जेलेन्स्कीले आग्रह गरेका छन् । राजनीतिक विवाद भइरहेका वेला जेलेन्स्कीले अमेरिका समक्ष थप सहयोगका लागि विशेष आग्रह गरेका हुन । अमेरिकाभित्र राजनीतिक विवादका कारण दशौं लाख डलरको सहायता प्याकेज अमेरिकी संसदमा अल्झिरहेको छ ।

रुसले युक्रेनमा आक्रमण गरेपछि तेस्रो पटक वासिङ्टन पुग्नेका जेलेन्स्कीले मंगलबारराष्ट्रपति जो बाइडेनसँग भेटवार्ता गर्ने कार्यक्रम रहेको छ । बाइडेनसँग पनि उनले यसैगरी आग्रह गर्ने अनुमान गरिएको छ ।

अमेरिका भ्रमणका क्रममा अमेरिकी सैन्य अधिकारीहरुलाई सम्बोधन गर्दै जेलेन्स्कीले युक्रेन आफ्नो स्वतन्त्रता रक्षाका लागि मात्रै नभइ विश्वको प्रजातन्त्र बचाउन युद्ध लडिरहेको जिकीर गरे । क्यापिटोल हिल (अमेरिकी संसद) मा सहायता प्याकेज सम्बन्धि विधेयक अल्झिने हो भने त्यसले भ्लादिमिर पुटिन र उनको रोगी समूहलाई मात्रै फाइदा गर्ने उनको भनाइ थियो ।