- २२ भाद्र २०८३, सोमबार / Sep 7, 2026
काठमाडौं, २४ भाद्र । सोमबार राजधानीमा भएको जेनजी आन्दोलनका क्रममा घाइते भएका सात जनाको सिनामंगलस्थित काठमाडौं मेडिकल कलेज (केएमसी) मा आईसीयूमा उपचार भइरहेको छ। अस्पतालले उनीहरूको अवस्था जटिल रहेको जनाएको छ।
अस्पतालका व्यवस्थापन प्रमुख नारायण प्रसाद दाहालका अनुसार सोमबारदेखि नै भर्ना भएका २४ जना घाइतेमध्ये ७ जनालाई आईसीयूमा राखिएको हो। उनले भने, “उपचार भइरहेका मध्ये ७ जना आईसीयूमा छन्, उनीहरूको अवस्था गम्भीर छ।”
सोमबारको आन्दोलनका क्रममा प्रहरीले चलाएको गोली लागेर हालसम्म १९ जनाको मृत्यु भएको पुष्टि भएको छ। ४०० भन्दा बढी घाइते विभिन्न अस्पतालमा उपचाररत छन्।
त्रिवि शिक्षण अस्पतालको ट्रमा सेन्टरमा मात्रै ११ जना गम्भीर घाइतेको उपचार भइरहेको छ। तीमध्ये ५ जनालाई आईसीयूमा राखिएको छ। प्रदर्शनमा प्रहरीको बल प्रयोग, व्यापक घाइते र मृत्युका घटनापछि काठमाडौं अझै तनावग्रस्त बनेको छ।
