- २८ श्रावण २०८३, बिहीबार / Aug 13, 2026
काठमाडौं, ४ साउन । कञ्चनपुरको भीमदत्त नगरपालिका–१९ का १४ जना महिला च्याउ टिप्न जंगल गएका बेला सम्पर्कविहीन भएका छन् । उनीहरूको खोजी कार्य तीव्र पारिएको प्रहरीले जनाएको छ ।
जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक (डीएसपी) टेकबहादुर रावतका अनुसार दशरथ टोलका ती महिलाहरू आइतबार बिहान करिब ११ बजे च्याउ खोज्न शुक्लाफाँटा राष्ट्रिय निकुञ्जतर्फ गएका थिए ।
सम्पर्कविहीन हुनेमा सकनी चौधरी, सविता चौधरी, सानी चौधरी, सकिया चौधरी, रमा चौधरी, लक्ष्मी चौधरी, मनिषा चौधरी, रिता चौधरी, सुनिता चौधरी, बिमला आग्री, सुमित्रा सुनार, शान्ति सुनार, प्रतिक्षा सुनार र सिवानी सुनार रहेका छन् ।
प्रहरीका अनुसार उनीहरू निकुञ्जभित्र बाटो बिर्सिएर अलमलिएको आशंका गरिएको छ । उनीहरूको खोजीका लागि प्रहरीसहित सम्बन्धित निकाय परिचालन गरिएको छ ।
यसैबीच, बेलडाँडी क्षेत्रका तीन जना भने मोबाइलमार्फत सम्पर्कमा आएका छन् । उनीहरू सुरक्षित रहेको जानकारी प्राप्त भएको प्रहरीले जनाएको छ ।
