- २८ श्रावण २०८३, बिहीबार / Aug 13, 2026
काठमाडौं, ४ साउन । अमेरिका र इरानबीच जारी सैन्य तनाव थप चर्किँदै जाँदा द्वन्द्वमा ज्यान गुमाउने अमेरिकी सैनिकको संख्या १७ पुगेको छ ।
अमेरिकी सेनाको सेन्ट्रल कमाण्ड (सेन्टकम) ले हर्मुज जलमार्ग हुँदै सञ्चालन हुने व्यावसायिक जहाजहरूको सुरक्षालाई ध्यानमा राख्दै इरानमाथि लगातार नवौँ रात हवाई आक्रमण गरिएको जनाएको छ । सेन्टकमका अनुसार इरानबाट हुन सक्ने सम्भावित सुरक्षा जोखिम न्यूनीकरण गर्न उक्त कारबाही गरिएको हो ।
इरानका स्थानीय सञ्चारमाध्यमहरूले भने निर्माणाधीन डार्खोभिन आणविक ऊर्जा केन्द्र आसपासका क्षेत्रमा अमेरिकाले कैयौँ क्षेप्यास्त्र प्रहार गरेको दाबी गरेका छन् ।
साथै समुद्री नाकाबन्दी कडाइका साथ लागू गर्ने क्रममा अमेरिकी सेनाले केही व्यावसायिक जहाजको मार्ग परिवर्तन गराएको र एउटा जहाजलाई निष्क्रिय बनाएको पनि ती सञ्चारमाध्यमहरूको दाबी छ ।
यसैबीच, उत्तरी इराकमा खसालिएको इरानी ड्रोनको बम निष्क्रिय पार्ने क्रममा भएको विस्फोटमा एक अमेरिकी सैनिकको मृत्यु भएको छ । यससँगै इरानसँगको जारी द्वन्द्वमा मृत्यु हुने अमेरिकी सैनिकको संख्या १७ पुगेको जनाइएको छ ।
द्वन्द्व अन्त्यका कूटनीतिक प्रयास प्रभावकारी हुन नसकिरहेका बेला दुवै पक्षबीच आक्रमण तीव्र बन्दै गएको छ । यसले पश्चिम एसियामा सुरक्षा चुनौती अझ गम्भीर बनेको विश्लेषण गरिएको छ ।
