- २८ भाद्र २०८३, आईतवार / Sep 13, 2026
काठमाडौं, १८ साउन । कञ्चनपुरको ६२ किलोमिटर लामो हुलाकी सडक निर्माण सुरु भएको साढे नौ वर्ष बितिसक्दा पनि सम्पन्न हुन सकेको छैन। ठेकेदार कम्पनीको लापरबाहीका कारण सडक निर्माण अलपत्र पर्दा स्थानीयवासीले अझै सास्ती भोग्नुपरेको छ।
२०७३ सालको फागुनमा ३० महिनाभित्र निर्माण सम्पन्न गर्ने लक्ष्यसहित तीन चरणमा ठेक्का सम्झौता गरिएको थियो। तर निर्धारित समय धेरैअघि सकिए पनि सडकको सम्पूर्ण काम अझै पूरा हुन सकेको छैन।
हुलाकी राजमार्ग योजना कार्यालय धनगढीका अनुसार पहिलो र अन्तिम प्याकेजको काम सम्पन्न भए पनि बीचको बेलौरी–बेल्डाडी खण्ड निर्माण कम्पनीको बेवास्ताका कारण अधुरै रहेको छ। कार्यालय प्रमुख मुकुन्दप्रसाद लामिछानेका अनुसार ठेकेदारले काम नगरेपछि सम्बन्धित ठेक्का रद्द गरेर करिब डेढ महिनाभित्र नयाँ ठेक्का आह्वान गर्ने तयारी भइरहेको छ।
यसैबीच, पचुई क्षेत्रको करिब १,४०० मिटर सडक खण्डमा भारतीय पक्षले सीमा विवाद उठाएकाले उक्त भाग बाहेक अन्य स्थानको निर्माण कार्यलाई अघि बढाइने योजना रहेको उनले जानकारी दिए।
सडक निर्माण लामो समयसम्म पूरा नहुँदा स्थानीयवासी वर्षायाममा हिलाम्मे सडक र आवागमनको समस्याबाट प्रभावित भएका छन्। जनप्रतिनिधिहरूले पनि निर्माण कार्य शीघ्र सम्पन्न गर्न सम्बन्धित निकायसँग माग गरेका छन्।
