- २८ भाद्र २०८३, आईतवार / Sep 13, 2026
काठमाडौं, १८ साउन । नर्सिङ क्षेत्रको सुधार तथा न्यूनतम पारिश्रमिकको ग्यारेन्टीसहित १५ बुँदे माग राख्दै आन्दोलनरत नर्सहरूले सोमबार काठमाडौंस्थित वीर अस्पताल परिसरमा प्रदर्शन गरेका छन्।
आन्दोलनरत नर्सहरूले आमरण अनशनमा बसेकी नर्स ज्योति रानाभाटको समर्थनमा प्रदर्शन गरेका हुन्। अनशनको पाँचौँ दिन रानाभाटको स्वास्थ्य अवस्था जटिल बनेपछि उनलाई वीर अस्पतालको सघन उपचार कक्ष (आईसीयू) मा भर्ना गरिएको छ।
यसबीच, स्वास्थ्य तथा जनसंख्या मन्त्री निशा मेहताले रानाभाटको आन्दोलनप्रति मन्त्रालय गम्भीर रहेको बताउँदै उच्चस्तरीय संवादमार्फत समस्याको सकारात्मक समाधान खोज्ने प्रयास भइरहेको जानकारी दिएकी छन्।
तर, अनशनरत रानाभाटले स्वास्थ्य, शिक्षा, श्रम तथा अर्थ मन्त्रालयका प्रतिनिधि सम्मिलित अधिकार सम्पन्न वार्ता टोलीसँग मात्र औपचारिक छलफल गर्ने अडान कायम राखेकी छन्।
यता, नेपाल नर्सिङ संघले विगतमा सरकारसँग भएका सहमति तत्काल कार्यान्वयन गर्न तथा अनशनरत रानाभाटको जीवन रक्षा गर्न आवश्यक पहल गर्न सरकारको ध्यानाकर्षण गराएको छ। नर्सिङ क्षेत्रसँग सम्बन्धित मागहरू शीघ्र सम्बोधन गर्नुपर्ने भन्दै आन्दोलनरत पक्षले दबाबलाई निरन्तरता दिने जनाएको छ।
