- १५ जेष्ठ २०८३, शुक्रबार / May 29, 2026
काठमाडौं, १७ साउन । रणनीतिक र राष्ट्रिय गौरवको आयोजना काठमाडौं–तराई/मधेश द्रुतमार्ग (फास्ट ट्रयाक) को निर्माणले गति लिएको छ । नेपाली सेनाको नेतृत्वमा निर्माण भइरहेको यो आयोजना २०८३ चैत मसान्तसम्म सम्पन्न गर्ने लक्ष्य सहित अघि बढाइएको हो ।
तर, अघिसम्म नीतिगत जटिलता, भौगोलिक कठिनाइ र जग्गा अधिग्रहण जस्ता समस्याले काम ढिलो भइरहेको थियो । अहिले भने नेपाली सेनाका प्रवक्ता राजाराम बस्नेतका अनुसार कामले नयाँ गति लिएको छ । आर्थिक वर्ष २०८१/८२ को अद्यावधिक विवरण अनुसार, २०७९ असार मसान्तसम्म द्रुतमार्गको समष्टिगत भौतिक प्रगति ४२.१३ प्रतिशत पुगेको छ । त्यस्तै, वित्तीय प्रगति ४४ प्रतिशत (मोविलाइजेशनसहित) पुगेको छ ।
१३ प्याकेजमध्ये अधिकांशमा काम भइरहेको
आयोजनामा रहेका १३ निर्माण प्याकेज मध्ये १२ वटा प्याकेज (प्याकेज १ देखि १० र ८ क, ८ ख, ९ क, ९ ख) मा हाल निर्माण कार्य जारी छ । प्याकेज ११ अन्तर्गतको खोकना–डुकुछाप खण्डमा भने अझै पनि जग्गा अधिग्रहण र आवागमन व्यवस्थापनका काममा समन्वय भैरहेको छ ।
लेनडाँडा खण्डको नमूना सडक
द्रुतमार्ग अन्तर्गतको लेनडाँडा खण्डमा सडक निर्माण कार्य ६१ प्रतिशत सम्पन्न भएको छ । यो खण्डमा रहेका ६ वटा पुल (कुल लम्बाइ ११०७ मिटर) मध्ये धेरैजसोको काम अगाडि बढेको छ । साथै, २ वटा डबल ट्युव सुरुङमार्गको ब्रेक थ्रु सम्पन्न भइसकेको छ भने ५ वटा कलभट पनि पूर्णरूपमा निर्माण सम्पन्न भएको छ । ८१ मिटर अग्लो पुलको फाउन्डेसन निर्माण पूरा भई सुपरस्ट्रक्चर निर्माण सुरु भएको छ । त्यस्तै, पुल नं. ३५, ३३३ मिटर लम्बाइको पहिलो पुल निर्माण सम्पन्न भई सवारी सञ्चालन समेत थालिएको छ ।
८० अर्बभन्दा बढी खर्च
हालसम्म आयोजना अन्तर्गत ८० अर्ब ५४ करोड खर्च भइसकेको छ । यसमा जग्गा खरिदका लागि १ अर्ब ६५ करोड, निर्माण व्यवसायीलाई ८२.३७ करोड र विद्युत प्राधिकरणलाई ९.८१ करोड पेश्की दिइएको छ । यी सबै रकम कटाएर खुद खर्च ७७ अर्ब ९७ करोड पुगेको छ ।
