- २६ असार २०८३, शुक्रबार / Jul 10, 2026
काठमाडौं, ५ जेठ । काठमाडौं महानगरपालिकाले आजदेखि असार २६ गतेसम्म हरेक शुक्रबार र शनिबार ‘टोल–टोलमा फिल्म महोत्सव’ आयोजना गर्ने भएको छ। समुदायमा रहेका रचनात्मक सीप, कला र सांस्कृतिक गतिविधिलाई प्रवर्द्धन गर्ने उद्देश्यले महोत्सव सञ्चालन गर्न लागिएको हो।
महानगरपालिकाकी कार्यवाहक मेयर सुनिता डंगोलका अनुसार महोत्सवअन्तर्गत सार्वजनिक स्थल, पार्क, डबली र चोकहरूमा सर्ट फिल्म प्रदर्शन, चलचित्र तथा रचनात्मक उद्योगसम्बन्धी संवाद, साथै विभिन्न सांस्कृतिक र सिर्जनात्मक कार्यक्रम आयोजना गरिनेछ।
महोत्सवको उद्घाटन कार्यक्रम आज खुलामञ्चमा हुनेछ, जसको व्यवस्थापन इकोज इन द भ्यालीले गर्नेछ। भोलिको कार्यक्रम असन क्षेत्रमा आयोजना हुने छ भने यसको व्यवस्थापन नीलः सांस्कृतिक क्लबले गर्ने जिम्मेवारी लिएको छ।
असार महिनाभर सञ्चालन हुने महोत्सवअन्तर्गत बालाजु बाइपास, बागबजार, यट्खा बहाल, लगन टोल, सुनधारा र मैतीदेवीलगायतका विभिन्न स्थानमा पनि कार्यक्रम आयोजना गरिनेछ। ती कार्यक्रमहरूको व्यवस्थापन स्थानीय सांस्कृतिक तथा सामाजिक संस्थाहरूले गर्नेछन्।
महानगरपालिकाले समुदायस्तरमा कला, चलचित्र र सिर्जनशील उद्योगको विकासलाई प्रोत्साहन गर्दै नागरिक सहभागिता बढाउने उद्देश्यले आठ वटा संस्थासँग सहकार्य गरी महोत्सव सञ्चालन गर्न लागेको जनाएको छ।
