- ५ असार २०८३, शुक्रबार / Jun 19, 2026
काठमाण्डौ, ५ जेठ । तनहुँको शुक्लागण्डकी नगरपालिकाले परम्परागत कृषि प्रणाली संरक्षण र किसानलाई खेतीतर्फ प्रोत्साहित गर्ने उद्देश्यले हलगोरु पाल्ने किसानलाई प्रोत्साहन रकम वितरण गरेको छ ।
वडाका ३९ जना किसानलाई प्रतिहलगोरु ५ हजार रुपैयाँका दरले नगद प्रोत्साहन प्रदान गरिएको हो । शुक्लागण्डकी नगरपालिकाको कृषि विकास शाखामार्फत सञ्चालित कार्यक्रमअनुसार रकम हिजो सम्बन्धित किसानलाई हस्तान्तरण गरिएको वडाले जनाएको छ ।
वडाध्यक्ष इन्द्र गुरुङले किसानलाई प्रोत्साहन रकम वितरण गर्दै कृषि क्षेत्रलाई आत्मनिर्भर र उत्पादनमुखी बनाउन नगरपालिकाले विभिन्न कार्यक्रम सञ्चालन गर्दै आएको बताउनुभयो ।
नगरपालिकाले आउँदा दिनमा पनि किसान लक्षित बीउ बिजन, तालिम, प्रविधि हस्तान्तरण तथा कृषि पूर्वाधार विकासका कार्यक्रमलाई निरन्तरता दिने जनाएको छ ।
प्रोत्साहन रकम प्राप्त गरेका किसानहरूले स्थानीय सरकारले कृषि क्षेत्रलाई प्राथमिकतामा राख्दै किसानमैत्री कार्यक्रम सञ्चालन गरेकोमा खुशी व्यक्त गरेका छन् ।
