- ५ असार २०८३, शुक्रबार / Jun 19, 2026
काठमाण्डौ, ९ असार । राजधानी काठमाण्डौमा भित्रिने र बाहिरिने सवारी साधनहरू अहिले निर्वाध रुपमा सञ्चालन भइरहेका छन् । ट्राफिक प्रहरीले राति पानी परे पनि सडकमा कुनै समस्या नहुँदा गाडी सहज रूपमा चल्नसक्ने जनाएको छ ।
तर पूर्व–पश्चिम राजमार्गअन्तर्गत नवलपरासीको दाउन्ने र दुम्कीवास क्षेत्रमा सडक हिलो र चिप्लो भएपछि गाडी सञ्चालनमा समस्या देखिएको छ । उक्त क्षेत्रमा सडक अवस्था खराब भएको कारण राति ७ बजेदेखि बिहान ५ बजेसम्म सवारी साधन सञ्चालनमा रोक लगाइएको छ ।
निर्माणाधीन विनयी खोला पुलको डाइभर्सन बाढीले बगाएको र त्यसका कारण समस्या थपिएको सडक डिभिजन कार्यालय भरतपुरले जानकारी दिएको छ । नयाँ पुल केही दिनभित्र सञ्चालनमा ल्याउने तयारी भइरहेको छ ।
यसैगरी, बाढी तथा पहिरोको जोखिमलाई ध्यानमा राख्दै बीपी राजमार्गमा १५ दिनसम्म राति यात्रुवाहक गाडी सञ्चालनमा रोक लगाइएको छ । यस्तै, पृथ्वी राजमार्गअन्तर्गत नौबिसे–मलेखु खण्डमा दुई दिनका लागि राति १० बजेदेखि बिहान ३ बजेसम्म सडक बन्द गरिएको छ ।
यस अवस्थाप्रति ट्राफिक प्रहरीले सचेतना अपनाउन सबै चालक र यात्रुहरूलाई आग्रह गरेको छ ।
