- २ भाद्र २०८३, मंगलवार / Aug 18, 2026
काठमाडौं । घरेलु कामदारका रूपमा कुवेतमा महिलाहरूलाई लैजान प्रतिबन्ध लगाइएको भए पनि अवैध बाटोबाट पुगेका महिलाहरूले आफूहरू बेचिएको बताएका छन् । रुपन्देही कञ्चन गाउँपालिका–१ सुन्दरनगरकी लक्ष्मीकुमारी दमाईलगायतले आफूलाई कुवेत ल्याएर बिक्री गरेको भन्दै उद्धारको अपिल गरेकी छन् ।
फेसबुकमार्फत भिडियो सार्वजनिक गर्दै उनीहरुले कुवेतको चालिया भन्ने ठाउँमा ओमबहादुर नाम गरेका एजेन्टले बिक्री गरेको बताएकी हुन् । नेपाल फर्काउन आग्रह गर्दा एजेन्टले नसुनेको उनीहरुको जिकिर छ ।
अवैध बाटो हुँदै कुवेत आएर समस्यामा परेको दर्जनबढी नेपाली महिला आफ्नो सम्पर्कमा रहेको समाजसेवी घनश्याम थापा मगरले बताएका छन् । अहिले कुवेतस्थित नेपाली दूतावासको सेल्टरमा ४२ जना दिदीबहिनी उद्धार हुने पर्खाइमा रहेको र दिन प्रतिदिन पीडितहरूको संख्या बढेकाले दूतावासलाई पनि कठिन भएको उनको तर्क छ ।
पछिल्लो समय कुवेतीले खदमा यानकी घरेलु महिला कामदारहरूको फोन ट्र्याक गरेर कोसँग बोल्छ, उसैलाई खदमा भगाएको केस लगाएर पक्राउ गर्ने गरेकाले पनि उद्धार गर्न थप समस्या हुने गरेको बताइएको छ ।
दलालले भारतको बाटो हुँदै जोर्डन, दुबई, कतार, साउदी अरेबिया, कुवेत, ओमानलगायतका मुलुकमा नेपाली महिला कामदार पठाउने गरेका छन् ।
