- ३० श्रावण २०८३, शनिबार / Aug 15, 2026
काठमाडौं, २३ असाेज । भौतिक पूर्वाधार तथा यातायात मन्त्रालयका सचिव केशव शर्मा, सडक विभागका महानिर्देशक विजय जैसीसहितको टोलीसंगै मन्त्री कुलमान घिसिङ बाढीपहिरोले क्षति पुर्याएको चौकीडाँडालगायत क्षेत्रको अनुगमनमा पुगेका छन्।
बाढीले क्षतिग्रस्त बनाएको करिब ४ किलोमिटर सडकमा अस्थायी डाइभर्सन निर्माण गरी सञ्चालनमा ल्याउने तयारी गरिएको छ। संघीय राजधानी काठमाडौंलाई बागमती, मधेश र कोशी प्रदेशका जिल्लाहरूसँग जोड्ने “लाइफ लाइन सडक” छिट्टै सञ्चालनमा ल्याउन सडक विभाग र निर्माण व्यवसायीलाई मन्त्री घिसिङले निर्देशन दिएका छन्।
गत वर्षको बाढीले विपी राजमार्गको भकुण्डे–नेपालथोक खण्डमा ठूलो क्षति पुर्याएको थियो। त्यसबेला अस्थायी डाइभर्सनमार्फत यातायात सञ्चालन गरिएकोमा पुनः यस वर्षको बाढीले करिब ४ किलोमिटर सडक पूर्ण रूपमा बगाएको हो।
स्थायी रुपमा सडक निर्माणका लागि केही खण्डमा ठेक्का प्रक्रिया सम्पन्न भइसकेको र बाँकी खण्डहरूमा ठेक्का सम्झौता अन्तिम चरणमा रहेको मन्त्रालयले जनाएको छ।
