- २१ कार्तिक २०८३, शनिबार / Nov 7, 2026
ललितपुर, ८ भाद्र । ललितपुर महानगरपालिकाले बाढीजन्य प्राकृतिक विपद्को पूर्वजानकारी दिन ‘अर्ली वार्निङ’ प्रणाली जडान गरेको छ । उपत्यकामा यस्तो प्रणाली प्रयोग गर्ने ललितपुर महानगर पहिलो स्थानीय तह बनेको छ ।
महानगरले हाल वडा नं. २८ हरिसिद्धीस्थित कर्मनाशा पुल र वडा नं. ४ नख्खु खोलामा यो प्रणाली जडान गरेको हो । बाढीको जोखिम बढेपछि प्रणालीमार्फत घण्टी बज्ने व्यवस्था गरिएको छ । करिब दुई किलोमिटर टाढासम्म यसको आवाज पुग्ने भएकाले वरपरका वडामा बसोबास गर्ने स्थानीयलाई सतर्क रहन सजिलो हुने बताइएको छ ।
महानगर प्रमुख चिरीबाबु महर्जनका अनुसार, “यी दुईवटा नदी वरपरका अन्य वडाहरूलाई सचेत गराउन यो प्रणाली उपयोगी हुनेछ । आवश्यक भए अन्य स्थानमा पनि जडान गर्ने योजना छ ।” महानगरले विपद् व्यवस्थापनका लागि आवश्यक सबै संयन्त्र एउटै छानामुनि व्यवस्थापन गरेको छ ।
पुलचोकस्थित नगर प्रहरी बल कार्यालयमा नगर प्रहरी, दमकल, शववहान, डुङ्गा, एम्बुलेन्सलगायतका साधन उपलब्ध छन् । महर्जनका अनुसार, अन्तर्राष्ट्रिय अभ्यासअनुसार विपद्को समयमा जनशक्ति र उद्धार सामग्रीसँगै एम्बुलेन्स पनि तुरुन्तै पुग्ने व्यवस्था गरिएको छ ।
गत वर्ष असोजमा आएको बाढीका बेला डुङ्गाको अभाव भएकाले महानगरले केही महिना अघि उद्धार प्रयोजनका लागि नयाँ डुङ्गा खरिद गरेको छ । हाल महानगरसँग साना–ठूला गरी ६ वटा दमकल पनि छन् ।
त्यसैगरी, महानगरले वडास्तरसम्म पुगेर सचेतना कार्यक्रम सञ्चालन गरिरहेको छ भने प्रत्येक वडामा विपद् व्यवस्थापन र सचेतनाका लागि स्वयंसेवक समूह गठन गर्ने तयारी भइरहेको छ । महानगरको भनाइमा, अर्ली वार्निङ प्रणाली जडान गर्नुको मुख्य उद्देश्य बाढीजस्ता प्राकृतिक विपद्बाट जनधनको क्षति न्यूनतम बनाउनु हो ।
