- २८ श्रावण २०८३, बिहीबार / Aug 13, 2026
प्योङयाङ, ८ भाद्र । उत्तर कोरियाली सरकारी सञ्चार माध्यमका अनुसार शनिबार दुई नयाँ हवाई रक्षा मिसाइल परीक्षण गरिएको छ। परीक्षणका क्रममा देशका सर्वोच्च नेता किम जोङ उन स्वयं उपस्थित रहेर निरीक्षण गरेका थिए।
कोरियन सेन्ट्रल न्युज एजेन्सी (केसीएनए) ले ती मिसाइलहरूमा ‘उत्कृष्ट लडाइँ क्षमता’ र ‘अद्वितीय प्रविधि’ प्रयोग भएको बताएको छ। यद्यपि प्राविधिक विवरण भने खुलाइएको छैन।
केसीएनएले उल्लेख गरेको छ कि परीक्षणले ड्रोन र क्रूज मिसाइल जस्ता विभिन्न हवाई लक्ष्य नष्ट गर्न यी मिसाइल सक्षम रहेको प्रमाणित गरेको छ। यसअघि मंगलबार करिब ३० जना उत्तर कोरियाली सैनिकहरूले दुई देशबीचको असैन्यीकृत क्षेत्र पार गर्दा दक्षिण कोरियाले चेतावनीस्वरूप गोली चलाएको पुष्टि गरेको थियो।
संयुक्त राष्ट्रसंघीय कमान्डका अनुसार ती सैनिकहरू क्षणिक रूपमा सीमा नाघेर पुनः फर्किएका थिए।त्यसैबीच, उत्तर कोरियाले दक्षिण कोरियामाथि ‘जानाजानी उक्साउने गतिविधि’ गरेको आरोप लगाएको छ। यसै सन्दर्भमा दक्षिण कोरिया र अमेरिका सोमबारदेखि व्यापक सैन्य अभ्यासमा रहेका छन्।
