खोल्सामा आएको बाढीले बगाउँदा २१ वर्षीय युवकको मृत्यु

ललितपुर, १२ असार । ललितपुरको दक्षिणपूर्वी भेगमा रहेको महाँकाल गाउँपालिका–६ ठूला दुर्लुङमा बुधबार साँझ आएको बाढीले एक युवकको ज्यान गएको छ। महाँकाल–४ कालेश्वर घर भई हाल ललितपुर महानगरपालिका–२९ हरिसिद्धीमा बसोबास गर्दै आएका २१ वर्षीय सविन दाहाल भर्‍याङ खोल्सामा आएको आकस्मिक बाढीले बगाउँदा ज्यान गएको हो।

स्थानीयका अनुसार साँझ करिब साढे ७ बजेको समयमा आएको बाढीले उनलाई बगाएको थियो। घटना लगत्तै खोजी कार्य थालिएको थियो। महाँकाल गाउँपालिका–६ का अध्यक्ष विनोद चौलागाईंका अनुसार, शव बेलुका १० बजेतिर फेला पारिएको हो।

‘हामीले नेपाली सेनालाई खबर गरेका छौँ, हेलिकप्टरको सहायताले उद्धार कार्य गर्नुपर्ने अवस्था छ’, अध्यक्ष चौलागाईंले जानकारी दिए। बाढीका कारण गाउँका सडकहरू बन्द भएका छन् र स्थानीयहरू त्रासमा छन्। हाल उक्त क्षेत्रमा अझै पनि सतर्कता अपनाइएको छ र थप क्षतिको विवरण आउन बाँकी रहेको बताइएको छ।