अर्घाखाँचीको धनचौरमा पहिरोले पुरिँदा दुई जनाको मृत्यु

मुख्य बुँदागत सारांश :

अर्घाखाँचीको भूमिकास्थान–१० धनचौरमा पहिरोको कारण एक दम्पतीको मृत्यु।
मृतक ६६ वर्षीय गोबिन्द बुढामगर र उनकी श्रीमती श्यामकला बुढामगर।
दुवै जना घाँस काट्न र चिउरी टिप्न गएका थिए।
समयमै नफर्किएपछि परिवारले प्रहरीलाई खबर गरेको।
शव सुक्खा पहिरोले पुरिएको अवस्थामा फेला।
प्रहरीले घटनाको थप अनुसन्धान गरिरहेको छ।

अर्घाखाँची, ३२ असार । अर्घाखाँचीको भूमिकास्थान नगरपालिका–१० धनचौर, तल्लोपाकुमा पहिरोले पुरिँदा एक दम्पतीको मृत्यु भएको छ। जिल्ला प्रहरी कार्यालय अर्घाखाँचीका अनुसार, ६६ वर्षीय गोबिन्द बुढामगर र उनकी श्रीमती श्यामकला बुढामगरको पहिरोले पुरिएर ज्यान गएको हो।

घटना मंगलबार साँझ भएको हो। उनीहरू घाँस काट्न र चिउरी टिप्न नजिकैको रोजा तुसारेपानी गएका थिए। तर बेलुकासम्म घर नफर्किएपछि आत्मीयजनले प्रहरीमा जानकारी दिएका थिए।

प्रहरी र स्थानीयको खोजीपछि दुवै जनाको शव सुक्खा पहिरोले पुरिएको अवस्थामा फेला परेको हो। जिल्ला प्रहरी कार्यालयका डिएसपी चक्रबहादुर मल्लका अनुसार, घटनाबारे थप अनुसन्धान भइरहेको छ।