- २६ असार २०८३, शुक्रबार / Jul 10, 2026
काठमाण्डौ, २४ साउन । कर्णाली राजमार्ग र राष्ट्रिय गौरवको आयोजना कालीगण्डकी करिडोर दुवै पहिरोका कारण अवरुद्ध भएका छन्। कर्णाली राजमार्गको सुर्खेत–जुम्ला सडकखण्डमा कालीकोटको शुभकालिका गाउँपालिका–१ गगनेखोला र खाडाँचक्र नगरपालिका–५ बिहानीमा लगातार वर्षापछि पहिरो खसेको हो।
जिल्ला प्रहरी कार्यालय कालीकोटका अनुसार पहिरोले सडक पूर्णरूपमा बन्द भएको छ र हाल सडक सफा गर्ने कार्य भइरहेको छ।
यसैगरी, कालीगण्डकी करिडोर पनि हिजोको ठूलो वर्षाका कारण बाग्लुङ नगरपालिका–१२ कालाखोलामा पहिरो खस्दा अवरुद्ध भएको हो। जिल्ला प्रहरी कार्यालय बाग्लुङका प्रहरी निरीक्षक सुनिल शर्माका अनुसार पहिरोका कारण सदरमुकामसँग दक्षिण बाग्लुङको सीधा यातायात सम्पर्क विच्छेद भएको छ।
करिडोर अवरुद्ध भएपछि मुस्ताङ जाने पर्यटक गाडी तथा बाग्लुङ–बुटवल, भैरहवा र सुनौली जाने लामो तथा छोटो दूरीका सवारीसाधन रोकिएका छन्। अहिले पहिरो पन्छाउने काम भइरहेको र दिउँसोसम्म सडक सुचारु गर्ने लक्ष्य राखिएको प्रहरीको भनाइ छ।
